Հայաստանի արտաքին գործերի նախարար Արարատ Միրզոյանը և նրա ֆրանսիացի պաշտոնակից Ժան-Նոել Բարոն այսօրվա հեռախոսազրույցում քննարկել են Հարավային Կովկասում անվտանգային իրավիճակը, Երևանի և Բաքվի միջև խաղաղության համաձայնագիրը, հայտնել են ՀՀ ԱԳՆ-ից։
«Միրզոյանը ներկայացրել է տարածաշրջանում անվտանգային իրավիճակը և Հարավային Կովկասում խաղաղության հաստատմանն ուղղված շարունակական ջանքերը, այդ թվում՝ ընդգծելով Հայաստանի և Ադրբեջանի միջև խաղաղության և միջպետական հարաբերությունների հաստատման մասին համաձայնագրի կնքման կարևորությունը: ՀՀ արտաքին քաղաքական գերատեսչության ղեկավարը բարձր է գնահատել այդ ուղղությամբ Ֆրանսիայի, այդ թվում՝ նախարար Բարոյի կողմից ցուցաբերված հետաքրքրությունը»,- ասված է հաղորդագրության մեջ։
Նախարարները քննարկել են նաև Հայաստան-Ֆրանսիա երկկողմ գործընկերության օրակարգային հարցեր:
Մարտի 13-ին Ադրբեջանի ԱԳՆ-ն հայտարարել էր, որ խաղաղության պայմանագրի տեքստի շուրջ բանակցությունների գործընթացն արդեն ավարտված է։ Նրա խոսքով՝ հայկական կողմը հայտնել է, որ ընդունել է վերջին երկու կետերը, որոնք մինչ այժմ համաձայնեցված չէին։ Պաշտոնական Երևանը հաստատել էր նախագծի հաստատման ավարտը և հայտարարել, որ պատրաստ է Բաքվի հետ սկսել խորհրդակցություններ՝ համաձայնագրի ստորագրման ժամկետների և վայրի շուրջ։ Մարտի 14-ին ՀՀ ԱԳ նախարար Արարատ Միրզոյանը մանրամասներ էր ներկայացրել խաղաղության պայմանագրի դրույթների մասին։
Ապրիլի 15-ին խորհրդարանում վարչապետ Նիկոլ Փաշինյանը տեղեկացրել էր, որ Ադրբեջանին առաջարկում է Ղարաբաղյան հակամարտության կարգավորման կառույցի՝ ԵԱՀԿ Մինսկի խմբի լուծարումն ու խաղաղության պայմանագիրը միաժամանակ ստորագրել:
