Ձեր համբուրած էշին մեր դռանը մի կապեք, ՀՀԿ հիմնադրման 35-ամյակին նվիրված նիստում հայտարարել է ՀՀ երրորդ նախագահ Սերժ Սարգյանը։ Նա այսպես է արձագանքել Նիկոլ Փաշինյանին իշխանություն տալու մասին մեղադրանքներին։
«Յուրաքանչյուրը պատասխանատու է այն էշի համար, որի ճակատը համբուրել է»,- ասել է Սարգսյանը։
Նա թվարկել է իշխանափոխությունից հետո լուծվելիք երեք առաջնահերթ խնդիրները։ Առաջինը, ըստ նախկին նախագահի, երկրի ներսում համերաշխության մթնոլորտի ստեղծումն է՝ որպես ազգային անվտանգության տեսանկյունից կարևորագույն խնդիր:
«Անհրաժեշտ կլինի երկրում արմատապես վերափոխել տեղեկատվական քաղաքականությունը՝ վերջ դնելով հասարակության մանիպուլացմանը, բևեռացմանն ու թշնամանքի քարոզին»,- ասել է նա:
Սարգսյանի խոսքով՝ հաջորդ խնդիրրը Զինված ուժերի մարտունակության վերականգնումն է՝ 21-րդ դարի մարտահրավերներին համապատասխան:
«Դա միանգամայն իրատեսական է զորքերի և զենքի գրագետ կառավարման, զինվորների բարձր մարտական ոգու վերականգնման, զորքերի համակողմանի ապահովման կազմակերպման, զինվորական բարձրորակ մասնագիտական կադրերով բանակի համալրման և մի շարք այլ խնդիրների լուծման պարագայում»,- նշել է նա:
Նախկին նախագահը կարևորել է նաև մասնագիտական բարձր որակի դիվանագիտական կորպուսի ձևավորումը ու Հայաստանի Հանրապետության դաշնակիցների և գործընկերների հետ հարաբերությունների վերականգնումը՝ տարբերակելով գործընկերներին դաշնակիցներից:
Ըստ Սարգսյանի՝ ՀՀ արտաքին քաղաքականության նոր հայեցակարգը փոփոխված աշխարհաքաղաքական իրողությունների պայմաններում, պետք է ամբողջովին պաշտպանի ՀՀ ազգային շահերն ու արժեքները:
Նա վերահաստատել է ՀՀԿ-ի այն դիրքորոշումը, որ Լեռնային Ղարաբաղի հակամարտությունը լուծված չէ, որքան էլ «կապիտուլյանտ վարչախումբը ձայնակցելով Ադրբեջանին՝ այդպես ներկայացնի»: Սարգսյանն արցախցիների իրավունքների մասին ՀՀ ԱԳՆ հայտարարությունն անվանել է «պետական մակարդակով այլևս անթաքույց տարվող արցախուրաց քաղաքականություն»:
«Արցախյան հիմնախնդրի միջազգայնացման նոր ռազմավարություն է անհրաժեշտ, որն ունենա իրավական, քաղաքական և հումանիտար բաղադրիչներ՝ ներառելով նաև արցախահայության իրավունքների պաշտպանության և հայրենիք վերադարձի միջազգային օրակարգը»,- շեշտել է նա:
Անդրադառնալով Հայաստանի և Ադրբեջանի միջև տարվող բանակցություններին՝ նա նշել է, որ այս գործընթացը ոչ թե «խաղաղության», այլ Հայաստանի դեմ մղվող հիբրիդային պատերազմի շարունակման մասին է։
Մարտի 27-ին ՀՀ երրորդ նախագահի գրասենյակը, անդրադառնալով ԱԺ-ում վարչապետ Նիկոլ Փաշինյանի կողմից հնչեցված հայտարարություններին, հայտարարել էր, որ նշաձողից ցածր ընկածների հետ ընդունված չէ բանակցել, ուր մնաց թե՝ բանավիճել։ Մարտի 26-ին Փաշինյանը խորհրդարանում պահանջել էր, որ Հայաստանի երեք նախկին նախագահները կա՛մ ուղիղ եթերում բանավիճեն իր հետ Արցախյան հարցի կարգավորման շուրջ, կա՛մ դադարեցնեն հայտարարություններ անել այս թեմայով։
