ՀՀ նախագահ Վահագն Խաչատուրյանն ապրիլի 4-ին ստորագրել է Եվրոպական միությանը Հայաստանի Հանրապետության անդամակցելու գործընթացի մեկնարկի մասին օրենքը, տեղեկանում ենք նախագահի պաշտոնական կայքից։
ՀՀ կառավարությունը հունվարի 9-ի նիստում հավանություն էր տվել ԵՄ-ին Հայաստանի անդամակցելու մասին նախագծին։ ԱԺ-ն փետրվարի 12-ի նիստում առաջին ընթերցմամբ ընդունել էր նախագիծը, որին «Պատիվ ունեմ» խմբակցությունը դեմ էր քվեարկել, իսկ «Հայաստան» խմբակցությունը չէր մասնակցել քվեարկությանը։ Երկրորդ ընթերմամբ և ամբողջությամբ նախագիծն ԱԺ-ն ընդունել էր մարտի 26-ին։
Ըստ ՀՀ վարչապետ Նիկոլ Փաշինյանի՝ «Ժողովրդավարական ուժերի հարթակ» քաղաքացիական հարթակի հեղինակած օրինագիծը չի նշանակում Հայաստանի անհապաղ անդամակցում ԵՄ-ին, և վերջին խոսքը պետք է հայտնեն քաղաքացիները՝ հանրաքվեի միջոցով։ Կրեմլից նշել էին, որ Հայաստանը չի կարող միաժամանակ լինել և՛ ԵՄ, և՛ ԵԱՏՄ անդամ։
Մարտի 24-ին ԱԺ եվրոպական ինտեգրման հարցերի հանձնաժողովը դրական եզրակացություն էր տվել «ԵՄ-ին ՀՀ անդամակցելու գործընթացի մեկնարկի մասին» նախագծին, որտեղ, ի տարբերություն նախնական տարբերակի, չկային «ՀՀ ժողովրդի կամքը» և «խնդիր դնելով Հայաստանը դարձնել անվտանգ, ապահով, զարգացած, բարեկեցիկ երկիր» եզրույթները։
ՌԴ փոխվարչապետ Ալեքսեյ Օվերչուկը մարտի 27-ին հայտարարել էր, որ Հայաստանն ստիպված կլինի ընտրություն կատարել ԵԱՏՄ-ի և ԵՄ-ի միջև։
