«Ազատության» հրապարակում մարտի 29-ին արցախցիների հանրահավաքի ավարտին Արցախի քաղաքական, հասարակական մի խումբ գործիչներ Անվտանգության խորհրդի նախկին քարտուղար Վիտալի Բալասանյանից պարզաբանումներ են պահանջել, թե ինչ է բանակցել ադրբեջանցիների հետ, գրել է «Հրապարակ»-ը։
Ըստ թերթի՝ արցախցիները նրան մեղադրել են Արցախի անկման և պատերազմից երկու տարի անց Փառուխը հանձնելու մեջ, սակայն Բալասանյանն ասել է, որ ինքը կապ չունի դրա հետ։ Նա հիշեցրել է, որ Անվտանգության խորհրդի քարտուղարը չէր կարող զորքի հետքաշման հրաման տալ, այդ հրամանը տվել է ՊԲ հրամանատար Կամո Վարդանյանը, պարզաբանել է թերթը։
Թերթի տեղեկությամբ՝ ներկաները տպավորություն են ստացել, որ «Վարդանյանը ՀՀ իշխանությունների հետ ջերմ հարաբերությունների շնորհիվ պատասխանատվության չի ենթարկվում»։
2023-ի սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության դեմ։ Ռազմական ագրեսիայի հետևանքով զոհվել էր 223, վիրավորվել՝ 244 մարդ, գերեվարվել էին 17-ը, անհետ կորել՝ 20-ը։ ԼՂ-ից բռնի տեղահանված 100 632 քաղաքացի էր ժամանել ՀՀ։
