Իշխանությունները որոշել են արցախցիների միջոցով պառակտիչ գործողություններ ծավալել․ ԶԼՄ

ՀՀ իշխանությունները մարտի 29-ին «Ազատության» հրապարակում արցախցիների նախատեսած հանրահավաքը պառակտելու փորձեր են անում, հայտնել է «Հրապարակ»-ը՝ հղում անելով արցախյան իրենց աղբյուրներին։

Ըստ թերթի՝ հանրահավաքի կազմակերպչական հարցերը քաղաքական գործիչների փոխարեն դրված են հասարակական սեկտորի ներկայացուցիչների վրա՝ ձևավորելով արցախցիների իրավունքների պաշտպանության խորհուրդ։

Լրատվականի տեղեկությամբ՝ ՀԿ որոշ ներկայացուցիչներ կազմակերպչական քննարկումների ժամանակ փորձել են սլաքները ՀՀ իշխանություններից տեղափոխել դեպի ՄԱԿ-ի և այլ միջազգային պատասխանատուների կողմ՝ ասելով, թե իրենք ՀՀ իշխանություններից չպետք է պահանջներ ունենան, Բաքվում պահվող գերիների, վերադարձի իրավունքի համար պետք է պահանջներ ներկայացնեն ՄԱԿ-ին, ՀՀ-ում հավատարմագրված արևմտյան դեսպաններին։ Ըստ թերթի՝ այդ փորձերը կասեցվել են, սակայն ոմանք հրապարակային հայտարարություններ են արել, թե չեն մասնակցելու հանրահավաքին:

Լրատվականի պնդմամբ՝ թեև հանրահավաքի կենտրոնում ապրիլի 1-ից արցախցիներին հատկացվող 40 հազարների դադարեցման հարցն է և բնակարանների ապահովման ռեալ ծրագրի պահանջը, սակայն սոցիալական խնդիրներից զատ՝ նաև քաղաքական օրակարգ են առաջ տանելու:

2025 թվականի հունվարի 1-ից Հայաստանում անշարժ գույք ունեցող 4899 արցախցի բռնի տեղահանվածներ այլևս չեն ստանում «40+10» ծրագրով նախատեսված 10 հազար դրամը (40 հազար դրամ բնակարանի վարձի փոխհատուցում և 10 հազար դրամ՝ կոմունալ վարձերի փոխհատուցում)։ Հատկացվող գումարի չափն աստիճանաբար կնվազի՝ 2025 թվականի հունվարից մարտ կկազմի 50 հազար դրամ, ապրիլից հունիս՝ 40 հազար դրամ, իսկ 2025 թվականի հուլիսից դեկտեմբեր՝ 30 հազար դրամ։

Ապրիլի 1-ից աջակցություն կստանան խոցելի հետևյալ խմբերին դասվող անձինք՝ մինչև 18 տարեկանները կամ հանրակրթական ուսումնական հաստատություններում կամ նախնական մասնագիտական (արհեստագործական) կամ միջին մասնագիտական ուսումնական հաստատությունում սովորող 18 տարին լրացած անձանց (շուրջ 33 000 մարդ), 63 և ավելի տարեկան անձինք (շուրջ 18 000 մարդ), կերակրողին կորցնելու դեպքում նպաստ կամ կենսաթոշակ ստացող կամ 1-ին կամ 2-րդ խմբի հաշմանդամություն ունեցող կամ ֆունկցիոնալության սահմանափակման խորը կամ ծանր աստիճան ունեցող անձանց (շուրջ 2600 մարդ):

Արցախի ՄԻՊ Գեղամ Ստեփանյանի խոսքով՝ Լեռնային Ղարաբաղից բռնի տեղահանվածներին «40+10» աջակցության ծրագիրն ապրիլից միայն հատուկ խմբերի համար շարունակելու մասին Հայաստանի իշխանությունների որոշումը չի քննարկվել Արցախի կառավարության և խորհրդարանի ներկայացուցիչների հետ։

Կարդացեք նաև՝

«Մեկ տարի առանց Արցախի». 2023թ․ ադրբեջանական հարձակման և բնիկ հայերի տեղահանության ժամանակագրություն