Թուրքիայում խորացող ներքաղաքական ճգնաժամը կարող է զգալիորեն թուլացնել Ադրբեջանին և Հայաստանի համար «հնարավորությունների պատուհան» ստեղծել, կարծում է թուրքագետ Վարուժան Գեղամյանը։
Նա չի բացառել, որ Անկարայի ճնշումը Հարավային Կովկասի ուղղությամբ մասամբ կթուլանա, ինչի արդյունքում կնվազեն նաև Բաքվի հնարավորությունները։ Գեղամյանն ընդգծել է, որ հնարավորության այս «պատուհանը» Երևանի համար երկար չի բացվի և «կարող է դառնալ ելքի դուռ, եթե այն բացող ազգային ուժեր լինեն»։
2016 թվականից ի վեր՝ Թուրքիայում առաջին անգամ ներքաղաքական ճգնաժամ է հասունանում և կապված է իշխանության դիրքերի մասնակի թուլացման, ընդդիմության դիրքերի ամրացման և ուժեղ առաջնորդի կայացման, տնտեսական ու սոցիալական բազմաթիվ կուտակված խնդիրների հետ։
«Թուրքիայում ներքաղաքական ճգնաժամը խորանալու բոլոր միտումներն ունի՝ անկախ առաջիկա օրերի փողոցային պայքարի արդյունքներից։ Իսկ դա նշանակում է, որ այսուհետ Էրդողանն ու իր թիմը ստիպված են լինելու բավական շատ ժամանակ ու քաղաքական ռեսուրս ծախսել ներքին ճակատում»,- գրել է Գեղամյանը։
Թուրքագետը հավելել է, որ մարտի 23-ին թուրքական ընդդիմությունը նախատեսում է զանգվածային բողոքի ցույցեր կազմակերպել ամբողջ երկրում՝ առաջինը 2013 թվականից ի վեր։ Նրա խոսքով՝ իշխանությունները, օգտագործելով ոստիկանական ուժերը, ավելի քան պատրաստ են նման սցենարին և դժվար թե հեշտությամբ զիջեն։
Թուրքիայի նախագահ Ռեջեփ Թայիփ Էրդողանի արտաքին քաղաքականության մեջ մանևրելու կարողությունը նույնպես նվազում է քրդական հարցի հետ կապված բարդ իրավիճակի, Սիրիայում իշխանափոխությունից հետո բազմաթիվ նոր խնդիրների և առաջիկա շաբաթների ընթացքում ուկրաինական ճգնաժամի ելքի պատճառով, եզրափակել է թուրքագետը։
Մարտի 19-ին Թուրքիայի անվտանգության ուժերը ձերբակալել էին Ստամբուլի քաղաքապետ, ընդդիմադիր Ժողովրդահանրապետական կուսակցության առաջնորդ Էքրեմ Իմամօղլուին։ Թուրքիայում հազարավոր մարդիկ դուրս են եկել փողոց՝ պաշտպանելու Իմամօղլուին։ Ոստիկանությունը հատուկ միջոցներ է կիրառել ցուցարարներին ցրելու համար։
