Գյումրիի իշխանությունները տարբեր հիմնարկների ղեկավարներից պահանջել են իրական ընտրողների ցուցակներ, ովքեր համաձայն են մարտի 30-ին կայանալիք համայնքի ղեկավարի ընտրություններում քվեարկել «Քաղաքացիական պայմանագրի» օգտին, գրել է «Հրապարակ» թերթը։
Ըստ լրատվականի՝ նման ցուցակներ են պահանջվել մանկապարտեզների, բուժհաստատությունների և այլ կազմակերպությունների տնօրեններից, որպեսզի ՔՊ-ն «հաշվարկի» առկա ձայները և հասկանա, թե ի՞նչ միջոցներ ձեռնարկել նրանց նկատմամբ, ովքեր մտադիր չեն աջակցել իրենց թեկնածուին։
ՔՊ պատգամավոր Կարեն Սարուխանյանը թերթին ասել է, որ ՔՊ-ն ցուցակագրումների և ճնշումների հետ կապ չունի։ «Դա ավելի շատ նախկինների գործելաոճն է»,- ասել է նա։
«Ժողովուրդ» օրաթերթը գրել է, որ ՀՀ վարչապետ Նիկոլ Փաշինյանի մասնակցությամբ մարտի 9-ի դրամահավաքն իրականացվել էր բացառապես անկանխիկ ձևով։ Ըստ թերթի՝ ՔՊ-ի հաշվին տարբեր գործարարներ, զանազան ոլորտների անձինք գումարներ են փոխանցել:
Հունվարի 20-ին հաստատվել էր Գյումրիում արտահերթ ընտրությունների նախապատրաստման և անցկացման հիմնական միջոցառումների ժամանակացույցը։
Փետրվարի 11-ին ռեժիսոր և պրոդյուսեր Ռուբեն Մխիթարյանը հայտարարել էր Գյումրու քաղաքապետի ընտրություններում առաջադրվելու իր որոշման մասին։ Փետրվարի 12-ին «Պատիվ ունեմ» խմբակցության անկուսակցական պատգամավոր Մարտուն Գրիգորյանն իր թեկնածությունն էր առաջադրել Գյումրու քաղաքապետի պաշտոնում։
2024 թվականի նոյեմբերի 26-ին Փաշինյանը հայտարարել էր Գյումրիի քաղաքապետի պաշտոնակատարի թեկնածուին որոշելու համար նախնական ընտրություն անցկացնելու մասին։ Դեկտեմբերի 13-ին Փաշինյանը Սարիկ Մինասյանին Գյումրիի ղեկավարի պաշտոնակատար էր նշանակել։ Գյումրիի քաղաքապետ Վարդգես Սամսոնյանը 2024 թվականի հոկտեմբերի 28-ին հրաժարական էր տվել։ Միաժամանակ՝ հրաժարական էին տվել նաև «Բալասանյան» դաշինքի ավագանու անդամները։
