Այսօր մենք թևակոխում ենք գործընկերության նոր փուլ, որը քիչ առաջ արձանագրեցինք Հայաստանի և Նիդերլանդների Թագավորության միջև ռազմավարական գործընկերության մասին հռչակագրի ստորագրմամբ, ասել է ՀՀ ԱԳ նախարար Արարատ Միրզոյանը՝ Նիդերլանդների ԱԳ նախարար Կասպար Վելդկամպի հետ մամուլի ասուլիսի ժամանակ:
«Մեր այսօրվա քննարկումներում կենտրոնացել ենք մեր հաջորդիվ անելիքների վրա, որի համար ունենք արդեն ամուր հիմք՝ ստորագրված փաստաթուղթը, որն իր մեջ ներառում է բացմաթիվ ոլորտներ, այդ թվում՝ քաղաքական և տնտեսական կապերի ամրապնդում, ենթակառուցվածքներ, կիբեռանվտանգություն, հիբրիդային վտանգների դեմ պայքար, ժողովրդավարական ինստիտուտների ամրապնդում, արդարադատության և իրավունքի խթանում», – ասել է Միրզոյանը:
Նրա խոսքով, համագործակցության շրջանակում նաև շարունակական ջանքեր կգործադրվեն Հարավային Կովկասում խաղաղության և կայունության ուղղությամբ, որը «հիմնված կլինի ինքնիշխանության, տարածքային ամբողջականության, ուժի և ուժի սպառնալիքի չկիրառման, միջազգայնորեն ճանաչված սահմանների անքակտելության սկզբունքների վրա»:
ՀՀ ԱԳ նախարարը հայտնել է, որ առանձին ուշադրություն է հատկացված տարածաշրջանային և միջազգային առևտրի, տրանսպորտային հաղորդակցությունների խթանման թեմային:
«Խաղաղության խաչմերուկը կարող է էական ներդրում ունենալ այս ոլորտում: Ներկայացվել է նաև Հայաստանի խաղաղության օրակարգը և երկխոսությունը Թուրքիայի և Ադրբեջանի հետ»,- ասել է Միրզոյանը:
Նիդերլանդների ԱԳ նախարարն, անդրադառնալով ռազմավարական գործընկերության փաստաթղթին, նշել է, որ այն ուղղված չէ որևէ երկրի դեմ:
«Ես տեսնում եմ, որ Հայաստանը փորձում է բալասավորել իր արտաքին քաղաքականությունը և այդ համատեքստում է, որ մենք ուզում ենք բարձրացնել երկու երկրների միջև մեր համագործակցությունը»,- հավելել է նա:
2025-ի հունվարին ՀՀ վարչապետ Նիկոլ Փաշինյանը հայտարարել էր, որ Հայաստանի օրակարգում «Խաղաղության խաչմերուկ» նախագծից բացի տրանսպորտային կոմունիկացիաների բացման մասով այլ նախագիծ չկա։ Նա այդպես էր մեկնաբանել Ալիևի հայտարարությունը, թե «Զանգեզուրի միջանցքը պետք է բացվի և կբացվի, Հայաստանը չպետք է «աշխարհագրական պատնեշ լինի Թուրքիայի և Ադրբեջանի միջև»։ Ադրբեջանի նախագահ Իլհամ Ալիևը «Խաղաղության խաչմերուկ» նախագիծը «թղթի կտոր» էր անվանել։
