ՀՀ վարչապետ Նիկոլ Փաշինյանը խոսել է տարածաշրջանում հաղորդակցությունների ապաշրջափակման համար Երևանի առաջարկած տարբերակների մասին։ «Արմենպրես»-ի իր հոդվածում վարչապետը, մասնավորապես, նշել է, որ Հայաստանը պատրաստ է երեք սահմանային անցակետ բացել Ադրբեջանի հետ սահմանին (ՀՀ կառավարությունը նման նախագիծը շրջանառության մեջ է դրել 2022 թվականին), ինչը թույլ կտա ադրբեջանական բեռնատարներին և մեքենաներին մուտք գործել Հայաստանի տարածք և մեկնել Նախիջևան ու Թուրքիա։
Ըստ նրա՝ տարածաշրջանային բոլոր տնտեսական և տրանսպորտային կոմունիկացիաների բացումը՝ արևմտյան Ադրբեջանից ՀՀ տարածքով դեպի Նախիջևան և հակառակ ուղղությամբ, Մեղրիից-Երասխ Ադրբեջանի տարածքով և հակառակ ուղղությամբ, ամբողջությամբ նախապատրաստված է և դրա իրագործման համար անհրաժեշտ է միայն Ադրբեջանի համաձայնությունը։
Վարչապետի խոսքով՝ Արևմտյան Ադրբեջանից Հայաստանով Նախիջևան հաղորդակցությանը Հայաստանը երբեք խոչընդոտ չի հարուցել:
«2022 թվականին, հասցեագրելով Ադրբեջանի մտահոգությունները, առաջարկել ենք փոխադարձության սկզբունքով միջազգային մասնագիտացված կազմակերպության արտապատվիրակել սահմանի անցման ժամանակ քաղաքացիների անձնագրային և բեռների մաքսային և այլ հսկողության front գործառույթը: Ադրբեջանը չի համաձայնել»,- հիշեցրել է Փաշինյանը:
Հաշվի առնելով Ադրբեջանի պնդումը, թե երկարատև հակամարտության պատճառով Ադրբեջանի քաղաքացիները կխուսափեն ՀՀ սահմանային և մաքսային հսկողություն անցնել, վարչապետն առաջարկել է այս փուլում Զանգելան-Մեղրի-Օրդուբադ և հակառակ ուղղությամբ, Երասխ-Օրդուբադ-Մեղրի և հակառակ ուղղությամբ հաղորդակցության բացումն սկսել երկաթուղային բեռնափոխադրումներից:
Փաշինյանի համոզմամբ՝ եթե Բաքվի մտահոգությունը Նախիջևանի հետ և հակառակ ուղղությամբ հուսալի բեռնափոխադրումներ ապահովելն է, այդ հարցը լուծված է, մնում է Ադրբեջանն ասի՝ այո:
Ըստ վարչապետի՝ ՀՀ-ն պատրաստ է նաև Նռնաձոր-Կարճևան երկաթուղու կառուցմանը՝ Հայաստան-Հայաստան և Ադրբեջան-Թուրքիա երկաթուղային կապի համար, ինչպես նաև Ադրբեջանից դեպի Նախիջևան խողովակաշարերի, էլեկտրահաղորդման գծերի, մալուխների տարանցում տրամադրել:
Փաշինյանը 2024 թվականի դեկտեմբերի 19-ին խոսել էր Ադրբեջանի հետ խաղաղության պայմանագրի չհամաձայնեցված երկու հոդվածի վերաբերյալ Բաքու ուղարկված Հայաստանի առաջարկների մասին։ Դեկտեմբերի 18-ին Ադրբեջանի նախագահ Իլհամ Ալիևը հայտարարել էր, որ խաղաղության պայմանագրի 17 կետից մնում է համաձայնեցնել 2-ը՝ Միջազգային դատարաններում կողմերի փոխադարձ պահանջներից հրաժարվելու և Հայաստանի ու Ադրբեջանի սահմանին երրորդ երկրների ներկայացուցիչների տեղակայման արգելքի վերաբերյալ։
Փետրվարի 25-ին ՀՀ ԱԳՆ-ն հայտնել էր, որ Երևանն ստացել է խաղաղության պայմանագրի վերաբերյալ Ադրբեջանի պատասխանը, իսկ մյուս ուղղություններով առաջարկները՝ կապուղիների ապաշրջափակում և սպառազինությունների փոխադարձ վերահսկման ու վերիֆիկացիայի մեխանիզմ, դեռ մնում են անպատասխան։ Փետրվարի 26-ին Փաշինյանը հայտարարել էր, որ Հայաստանի և Ադրբեջանի միջև երկաթուղային հաղորդակցությունը վերականգնելու առաջարկին ի պատասխան՝ Երևանը դեռևս սպասում է Բաքվի պաշտոնական արձագանքին։ Նա նաև համոզմունքն էր հայտնել, որ տարածաշրջանում պատերազմի, էսկալացիայի նախադրյալ չկա։
