ՌԴ ԱԳ նախարար Սերգեյ Լավրովը և ՌԴ նախագահ Վլադիմիր Պուտինի օգնական Յուրի Ուշակովը փետրվարի 18-ին Սաուդյան Արաբիայի մայրաքաղաք Էր Ռիադում հանդիպում կանցկացնեն ԱՄՆ ներկայացուցիչների հետ, «Ռիա Նովոստիի» փոխանցմամբ՝ հայտնել է ՌԴ նախագահի մամուլի քարտուղար Դմիտրի Պեսկովը:
«Հանդիպումն, առաջին հերթին, նվիրված կլինի ռուս-ամերիկյան հարաբերությունների ամբողջ համալիրի վերականգնմանը»,- ասել է նա:
Պեսկովը մանրամասնել է, որ Լավրովն ու Ուշակովն այսօր Էր Ռիադ են մեկնում ՌԴ նախագահ Պուտինի հանձնարարությամբ:
«Քննարկումը նվիրված կլինի ուկրաինական կարգավորման շուրջ հնարավոր բանակցությունների նախապատրաստմանը և երկու նախագահի (Պուտին-ԱՄՆ նախագահ Դոնալդ Թրամփ-խմբ․) հանդիպման կազմակերպմանը»,- հավելել է Պեսկովը։
Կրեմլի ներկայացուցիչը հստակեցրել է, որ Ռուսաստանը պատրաստ է Էր Ռիադում ԱՄՆ-ի հետ նաև Մերձավոր Արևելքում տիրող իրավիճակի հետ կապված հարցեր քննարկել։ Մամուլի քարտուղարը նաև բացատրել է, որ Սաուդյան Արաբիան, որպես բանակցությունների վայր, ձեռնտու է երկու կողմերին:
Փետրվարի 15-ին Սաուդյան Արաբիան պատրաստակամություն էր հայտնել երկրում ընդունել Ռուսաստանի և ԱՄՆ նախագահների հանդիպումը։ Թրամփն ու Պուտինը հեռախոսազրույց էին ունեցել փետրվարի 12-ին։ Զրույցից հետո Թրամփը հայտնել էր, որ Պուտինի հետ պայմանավորվել է բանակցային գործընթաց սկսել Ուկրաինայում հակամարտությունը դադարեցնելու համար։
Փետրվարի 16-ին ԱՄՆ պատվիրակությունը մեկնել էր Սաուդյան Արաբիա՝ ՌԴ ներկայացուցիչների հետ բանակցությունների նպատակով։
