ԿԸՀ-ն հայտարարել է Գյումրի և Փարաքարի ավագանու արտահերթ ընտրությունների օրը

Կենտրոնական ընտրական հանձնաժողովը հայտարարել է Գյումրի և Փարաքարի ավագանու արտահերթ ընտրությունների օրը։ 

Ըստ գերատեսչության Գյումրիի և Արմավիրի մարզի Փարաքար համայնքի ավագանու արտահերթ ընտրությունները նշանակվել են 2025 թվականի մարտի 30-ին։ 

ԿԸՀ-ն հիշեցրել է, որ «ՀՀ ընտրական օրենսգիրք» սահմանադրական օրենքի 128-րդ հոդվածի 2-րդ մասի համաձայն՝ «Երևանի, Գյումրու, Վանաձորի ավագանիների արտահերթ ընտրություններն անցկացվում են ավագանիների արտահերթ ընտրություն նշանակելու մասին որոշումն ուժի մեջ մտնելուց հետո` ոչ շուտ, քան 30 և ոչ ուշ, քան 40 օր հետո` վերջին կիրակի օրը»։

Նույն հոդվածի 4-րդ մասի համաձայն՝ «Համամասնական ընտրակարգով անցկացվող համայնքների ավագանու արտահերթ ընտրությունների անցկացման օրը նշանակում է Կենտրոնական ընտրական հանձնաժողովը` արտահերթ ընտրություններ նշանակելու մասին կառավարության որոշումն ուժի մեջ մտնելուց հետո` մեկշաբաթյա ժամկետում»։

Հետևաբար, Գյումրու ավագանու արտահերթ ընտրություններ նշանակելու կառավարության 2024 թվականի դեկտեմբերի 12-ի որոշումն ուժի մեջ կմտնի 2025 թվականի փետրվարի 20-ից։

«ՀՀ «Ընտրական օրենսգիրք» սահմանադրական օրենքի կարգավորումների և ՀՀ կառավարության որոշման ուժի մեջ մտնելու օրվա համադրումից ակնհայտ է դառնում, որ Գյումրի համայնքի ավագանու արտահերթ ընտրությունները պետք է տեղի ունենան 2025 թվականի մարտի 30-ին»,- պարզաբանվում է հանձնաժողովի հաղորդագրությունում։

Հանձնաժողովի հունվարի 20-ի որոշմամբ՝ հաստատվել է արտահերթ ընտրությունների նախապատրաստման և անցկացման հիմնական միջոցառումների ժամանակացույցը։

Փետրվարի 11-ին ռեժիսոր և պրոդյուսեր Ռուբեն Մխիթարյանը հայտարարել էր Գյումրու քաղաքապետի ընտրություններում առաջադրվելու իր որոշման մասին։ Նա նշել էր, որ «գործող իշխանությունները չպետք է հաջողություն գրանցեն Գյումրիի ընտրություններում»՝ հավելելով, որ պատրաստ է այդ նպատակով համագործակցել նմանատիպ պաշտոն զբաղեցնող այլ թեկնածուների հետ։ Փետրվարի 12-ին «Պատիվ ունեմ» խմբակցության անկուսակցական պատգամավոր Մարտուն Գրիգորյանն իր թեկնածությունն էր առաջադրել Գյումրու քաղաքապետի պաշտոնում։ Նա նշել էր, որ բանակցում է նախընտրական քարոզարշավի բոլոր մասնակիցների հետ, բացի իշխանություններից։

2024 թվականի նոյեմբերի 26-ին վարչապետ Նիկոլ Փաշինյանը հայտարարել էր Գյումրիի քաղաքապետի պաշտոնակատարի թեկնածուին որոշելու համար նախնական ընտրություն անցկացնելու մասին։ Դեկտեմբերի 13-ին Փաշինյանը Սարիկ Մինասյանին Գյումրիի ղեկավարի պաշտոնակատար էր նշանակել։ Գյումրիի քաղաքապետ Վարդգես Սամսոնյանը 2024 թվականի հոկտեմբերի 28-ին հրաժարական էր տվել։ Միաժամանակ՝ հրաժարական էին տվել նաև «Բալասանյան» դաշինքի ավագանու անդամները։