Ռուսաստանը ողջունում է Հայաստանի և Ադրբեջանի ինքնուրույն քայլերը և պատրաստ է աջակցել․ Պեսկով

Ռուսաստանը պատրաստ է աջակցել Հայաստանի և Ադրբեջանի միջև խաղաղ կարգավորմանը, բայց նաև ողջունում է կողմերի ինքնուրույն քայլերը, հայտարարել է ՌԴ նախագահի մամուլի քարտուղար Դմիտրի Պեսկովը՝ ի պատասխան ՀՀ խորհրդարանի խոսնակ Ալեն Սիմոնյանի հայտարարության։

Այսօր ավելի վաղ Սիմոնյանը ճեպազրույցի ժամանակ հայտարարել էր, որ Ռուսաստանի մասնակցությունը հայ-ադրբեջանական հարաբերությունների կարգավորմանը «հավանական չէ» անցյալի փորձի «վատ հիշողությունների» պատճառով։

«Քիչ հավանական եմ համարում, բայց մենք յուրաքանչյուր առաջարկ քննարկում ենք և պատրաստ ենք քննարկել։ Անցյալի փորձը շատ վատ հիշողություն է թողել։ Վերջիվերջո, կան չլուծված, մինչ օրս պատասխան չստացած հարցեր. օրինակ՝ Հայաստան ներխուժած ադրբեջանական զորքերի հետ կապված Ռուսաստանի դիրքորոշումը թե՛ ՀԱՊԿ-ի, թե՛ Հայաստան-Ռուսաստան միջպետական պայմանագրի շրջանակներում»,- ասել էր Սիմոնյանը։

Կրեմլի խոսնակն ընդգծել է՝ Մոսկվայի դիրքորոշումն այն է, որ հարավկովկասյան տարածաշրջանը մնա կանխատեսելի, խաղաղ, և այն իսկապես դառնա բարգավաճման և համագործակցության տարածք:

«Մենք տարբեր մակարդակներով հայտարարություններ ենք լսել Երևանից, որ, ըստ էության, միջնորդների կարիք չկա: Ե՛վ Երևանը, և՛ Բաքուն արդեն ի վիճակի են շարունակել բանակցությունները մինչև այս գործընթացի ավարտը։ Մենք կողջունենք նրանց անկախ ջանքերը»,- նշել է Պեսկովը: 

Հունվարի 28-ին «Ժողովուրդ»-ը, վկայակոչելով մերձբալթյան երկրներից մեկի խորհրդարանական ներկայացուցչին, տեղեկացրել էր, որ Հայաստանի խորհրդարանի խոսնակը հունվարի 23-ի հանդիպման ժամանակ սուր քննադատության է ենթարկել Ռուսաստանին և հույս հայտնել, որ երկիրը պարտություն կկրի։ Ըստ թերթի՝ Սիմոնյանը հայտարարել էր, որ «Ռուսաստանը պետք է ջախջախվի, պարտվի, վերանա, որպեսզի Հայաստանն ու Բալթյան երկրները երջանիկ լինեն»։

Հունվարի 29-ին Սիմոնյանը հայտարարել էր հայաստանյան երկու լրատվամիջոցի դեմ դատական ​​հայց ներկայացնելու որոշման մասին՝ իրեն վերագրվող «հակառուսական հայտարարությունների» վերաբերյալ հրապարակումների պատճառով։ Առաջին հայցը, ըստ խորհրդարանի նախագահի, ուղղված կլինի «Ժողովուրդ» օրաթերթի դեմ, երկրորդ հայցը՝ «Մեդիահաբ» լրատվականի։ 

Հունվարի 21-ին ՌԴ ԱԳ նախարար Սերգեյ Լավրովը հայտարարել էր, որ Մոսկվան մասնակցում է հարաբերությունների կարգավորմանը «հենց այնքանով, որքանով այդ մասնակցությունը պահանջում են Երևանն ու Բաքուն՝ ոչ ավել, ոչ պակաս»։