ՀՀ վարչապետ Նիկոլ Փաշինյանը բարձր է գնահատել QR կոդերի միջոցով հասարակական տրանսպորտի վճարումների նոր համակարգը։ Նրա հրապարակած տեսանյութում ասվում է, որ որոշել է աշխատանքի գնալ մետրոյով, քանի որ եղանակը հարմար չէ հեծանիվ վարելու համար:
Փաշինյանն ընդգծել է, որ QR կոդով տոմս գնելու համար իրենից ընդամենը մի քանի վայրկյան է պահանջվել։ Ավելի վաղ սոցցանցերի օգտատերերը դժգոհում էին կոդերի գնման և թողարկման ժամանակ ստեղծված անհարմարությունից և քննադատում Երևանի իշխանություններին։
Նշենք, որ այսօր մայրաքաղաքի ավագանին պետք է քննարկի տրանսպորտային նոր համակարգի ներդրման հարցը։ Այն նախաձեռնել է ընդդիմությունը, որը կոչ է արել բոյկոտել որոշումը։
Փաշինյանը նաև ասել է, որ հանդիպել է երկրորդ խմբի հաշմանդամների և թոշակառուի, ովքեր տեղյակ չէին երթևեկության համար իրենց տրամադրվող արտոնյալ պայմաններից։
«2-րդ խմբի հաշմանդամը փետրվարի 1-ից հետո անվճար է երթևեկելու, այդ թվում՝ ավտոբուսներով: Մինչ այս նրանք անվճար երթևեկում էին միայն էլեկտրական տրանսպորտով: Թոշակառուն 30% զեղչ է ունենալու»,- ասել է նա։
2024 թվականի մարտի 12-ին Երևանի ավագանին ընդունել էր տոմսերի միասնական համակարգ ներդնելու նախագիծը։ Երևանի քաղաքապետ Տիգրան Ավինյանը հունիսի 25-ին ասել էր, որ 2025 թվականի հունվարի 1-ից կսկսի գործել հասարակական տրանսպորտի ուղեվարձի միասնական համակարգ, որը նախատեսում է տրանսպորտի թանկացում։ Սակագներն ուժի մեջ կմտնեն փետրվարի 2-ից։
Նոյեմբերի 3-ին Մարությանը հայտարարել էր հունվարի 1-ից Երևանում հասարակական տրանսպորտի ուղեվարձի թանկացման դեմ ստորագրահավաք սկսելու մասին։ Նոյեմբերի 19-ին Երևանի ավագանին ընդունել էր տրանսպորտի սակագների արտոնությունների փաթեթը, ըստ որի տրանսպորտից օգտվող առանձին խմբերի համար կգործեն այլ սակագներ, առանձին խմբեր տրանսպորտից անվճար կօգտվեն։
Հունվարի 15-ին Երևանի ավագանու «Ազգային առաջընթաց» խմբակցության անդամ Իզաբելլա Աբգարյանը հայտնել էր, որ Մարությանը 76 հազար ստորագրություն է հավաքել ընդդեմ հասարակական տրանսպորտի սակագնի բարձրացման։
