Հայաստանն ու Իրանը հայտարարել են միմյանց արտաքին քաղաքական գերակայությունների փոխադարձ հարգանքի մասին։ Այս մասին հայտարարվել է Թեհրանում ՀՀ ԱԳ փոխնախարար Վահան Կոստանյանի և Իրանի ԱԳ նախարարի քաղաքական հարցերով տեղակալ Մաջիթ Թախթ Ռավանչիի հանդիպման ժամանակ։
Ինչպես հայտնել է ՀՀ ԱԳՆ-ն, կողմերը, արձանագրելով համագործակցության բարձր մակարդակը, կարևորել են հարգանքի և փոխվստահության մթնոլորտում հարաբերությունների զարգացմանն ուղղված համատեղ ջանքերը:
Կոստանյանը վերահաստատել է, որ Երևանը բարձր է գնահատում Իրանի սկզբունքային դիրքորոշումը Հայաստանի տարածքային ամբողջականությունն ու սահմանների անքակտելիության անվերապահորեն հարգելու անհրաժեշտության վերաբերյալ:
Հայ դիվանագետը խոսել է Հայաստանի և Ադրբեջանի միջև հարաբերությունների կարգավորման գործընթացի շրջանակներում տեղի ունեցած վերջին զարգացումների մասին՝ ընդգծելով, որ Երևանը հավատարիմ է խաղաղության օրակարգին և նույնն ակնկալում է Բաքվից:
Այս համատեքստում կարևորվել են Հայաստանի դիմակայունության բարձրացմանն ուղղված քայլերը, ասվում է հաղորդագրության մեջ։ Կողմերը քննարկել են երկու երկրների տնտեսական համագործակցության խորացման հեռանկարները՝ կարևորելով ենթակառուցվածքային և էներգետիկ ոլորտներում իրականացվող ծրագրերը:
Նշվում է, որ Իրան կատարած այցի շրջանակներում Կոստանյանը հանդիպել է նաև Իրանի ԱԳ նախարար Աբբաս Արաղչիի հետ:
Հունվարի 14-ին Հայաստանն ու ԱՄՆ-ն ստորագրել էին ռազմավարական գործընկերության հանձնաժողովի կանոնադրությունը:
Հունվարի 17-ին Իրանի նախագահ Մասուդ Փեզեշքիանը ՌԴ նախագահ Վլադիմիր Պուտինի հետ հանդիպման ժամանակ հայտարարել էր, որ Եվրասիական տարածաշրջանի խնդիրները պետք է լուծվեն «առանց արտատարածաշրջանային ուժերի մասնակցության»:
