Armenia Today-ը հարցում է անցկացրել երևանցիների շրջանում՝ պարզելու նրանց կարծիքը Հայաստանի հետ վիզային ռեժիմի ազատականացման շուրջ բանակցություններ սկսելու ԵՄ որոշման վերաբերյալ։
Հարցվածների մեծամասնությունը կողմ է արտահայտվել Հայաստանի և ԵՄ-ի միջև վիզային ռեժիմի ազատականացմանը։ Հարցման մասնակիցներից մեկը սա համարել է դրական զարգացում Հայաստանի համար։
«Կարծում եմ՝ Հայաստանում վիզա ստանալը շատ դժվար կլինի, և դա կախված է բազմաթիվ հասարակական-քաղաքական գործոններից»,- հավելել է նա։
Մեկ այլ հարցված ակնհայտորեն վստահ է այս նախաձեռնության հաջողության մեջ․ «Իհարկե, կհաջողվի, ժամկետների մասին դժվարանում եմ ասել, բայց մեր վարչապետին կհաջողվի»։
Սփյուռքից ժամանած հարցման մասնակիցը հույս է հայտնել , որ Հայաստանը կկարողանա հասնել Եվրոպայի հետ վիզաների ազատականացմանը, սակայն կարծում է, որ այդ գործընթացը շատ ժամանակ կպահանջի։
«Երկար ժամանակ կպահանջվի՝ մոտավորապես ինը տարի, ինչպես Վրաստանում էր։ Կարծում եմ՝ ինը տարի հետո ամեն ինչ կփոխվի»,- ասում է նա։
Հարցման մեկ այլ մասնակից նշելով, որ ԵՄ-ի հետ վիզային ռեժիմի ազատականացումն անհրաժեշտ է Հայաստանի համար, ընդգծել է երկրում կենսապայմանների բարելավման անհրաժեշտությունը, որպեսզի այս գործընթացը չհանգեցնի երիտասարդների արտագաղթին․ «Պետք է պայմաններ ստեղծենք աշխատանքի համար, գործարաններ բացենք, և մեր երիտասարդությունը չի ցանկանա հեռանալ»։
Քաղաքացիներից մեկը ծայրահեղ բացասական է վերաբերվում ԵՄ-ի հետ վիզաների ազատականացմանը․ «Ես բացարձակապես չեմ ընդունում Եվրոպան, քանի որ այն փչացնում է իմ ողջ ազգային հարստությունն ու համակարգը»:
Մեկ այլ հարցված էլ կարծում է, որ Հայաստանին պետք չէ ԵՄ-ի հետ վիզաների ազատականացումը։
«Հայաստանին սա պետք չէ. ահա Վրաստանի օրինակը, որը դատարկ է: Հիմա էլ հերթը Հայաստանինն է»,- նշել է տղամարդը։
Հարցման մեկ այլ մասնակից կարծիք է հայտնել, որ երբ խոսում ենք լավ բանի մասին, մեր կառավարությանը ոչինչ անել չի հաջողվում, բայց եթե ողբերգություն լինի, հիանալի գլուխ կհանեն։ Մեկ այլ հարցված չի բացառել, որ Հայաստանը կարող է հասնել Եվրոպայի հետ վիզաների ազատականացմանը, սակայն, ըստ նրա, Հայաստանին դա պետք չէ։
«Սա հայերի ինչի՞ն է պետք։ Ո՞ւմ է պետք Եվրոպան։ Մենք պետք է պահպանենք Հայաստանն ու մեր ինքնությունը, հայ լինենք. մեզ Եվրոպան պետք չէ»,- ասում է նա։
Հուլիսի 22-ի նիստում Եվրամիության խորհուրդը հավանություն էր տվել Հայաստանի հետ վիզային ռեժիմի ազատականացման շուրջ երկխոսություն սկսելու Եվրահանձնաժողովի մտադրությանը, ինչպես նաև որոշել էր հատկացնել 10 մլն եվրո՝ Հայաստանի զինված ուժերի նյութատեխնիկական ներուժն ուժեղացնելու համար և օգնել բարելավել քաղաքացիական բնակչության պաշտպանությունը ճգնաժամային և արտակարգ իրավիճակներում: Հայաստանի արտաքին գործերի նախարարության ղեկավար Արարատ Միրզոյանը «կարևոր հանգրվան և խորացող գործընկերություն» էր անվանել Հայաստանին օգնություն տրամադրելու և վիզային ռեժիմի ազատականացման շուրջ երկխոսություն սկսելու ԵՄ խորհրդի որոշումը։
Մանրամասները՝ տեսանյութում։
