Մոսկվան հույս ունի, որ Բաքվի և Թեհրանի միջև հարաբերություններում հակասությունները ժամանակավոր բնույթ են կրում և շուտով կհաղթահարվեն: Այդ մասին հայտարարել է ՌԴ ԱԳ նախարար Սերգեյ Լավրովը իրանցի գործընկերոջ հետ բանակցությունների արդյունքներով կայացած մամուլի ասուլիսում: «Դա կնպաստի Ռուսաստանի, Իրանի և Ադրբեջանի եռակողմ համագործակցության առաջխաղացմանը, այդ թվում նաև Հյուսիս-Հարավ միջազգային տրանսպորտային միջանցքի նախագծերի իրականացման գործում», – ասել է նա:
Անդրադառնալով Հարավային Կովկասում տիրող իրավիճակին՝ Իրանի արտաքին գործերի նախարար Հոսեյն Ամիր Աբդոլլահիանը հայտարարել է, որ արտաքին միջամտությունն այս տարածաշրջանում էլ ավելի կբարդացնի իրավիճակը: «Անհրաժեշտ է «3+3» ձևաչափի միջոցով, ինչպես նաև այլ մեխանիզմների գործադրմամբ, առանց ուժի դիմելու, կարգավորել այս տարածաշրջանում առկա խնդիրները», – հայտարարել է նա:
Իրանցի դիվանագետի խոսքով՝ Թեհրանը մերժում է աշխարհաքաղաքական իրավիճակի ցանկացած փոփոխություն՝ ցանկացած արդարացմամբ: «Պետք է շարժվել դեպի կայուն խաղաղություն և ներառական անվտանգություն երկխոսության և քաղաքական կարգավորման միջոցով», – եզրափակել է նա:
Իրանում Ադրբեջանի դեսպանատան վրա հունվարի 27-ի առավոտյան հարձակում էր կատարվել, որի հետևանքով զոհվել է դիվանագիտական առաքելության պահպանության ծառայության պետը, ևս երկու աշխատակից վիրավորվել են: Ադրբեջան հունվարի 29-ին տարհանել է Իրանում իր դեսպանատան աշխատակիցներին և նրանց ընտանիքների անդամներին։
