«Հրապարակ» թերթը գրում է. «Գեներալ Սեյրան Սարոյանը մոտ երեք ամիս առաջ վաճառել է իրեն պատկանող թիվ 2 հիվանդանոցը: Տեղեկություններ կան, որ նա մտադիր է բոլոր բիզնեսները փակել ու հեռանալ Հայաստանից։ Գնորդն «Անի» կաթնամթերքի արտադրության սեփականատերն է։ Տեւական ժամանակ է՝ հիվանդանոցի բուժանձնակազմն անհանգստություններ ուներ, թե ինչ ճակատագիր է սպասվում իրենց, շարունակվելո՞ւ է արդյոք ԲԿ-ի գործունեությունը, թե՞ այլ նպատակով են օգտագործելու շենքը։ Սակայն վերջերս տեղեկացրել են, որ հիվանդանոցը կշարունակի գործել»:
«Փաստ» օրաթերթը գրում է. «Արցախյան պատերազմից մեկ տարի անց տարածաշրջանային մակարդակով ակտիվորեն քննարկվում է Հարավային Կովկասում տրանսպորտային ուղիների ապաշրջափակման թեման։ Ըստ այդմ, Թուրքիան փորձում է ակտիվորեն առաջ մղել Հարավային Կովկասում 3+3 ձևաչափով համագործակցության 6-ակողմ հարթակ ստեղծելու իր առաջարկը։ Բայց հարկ է նկատել, որ խնդիրը ոչ այնքան համագործակցության ձևաչափն է, որքան թե ինչ պայմաններով տեղի կունենա Հարավային Կովկասում նախատեսվող տրանսպորտային ուղիների ապաշրջափակումը, ու այդ կապակցությամբ ինչպիսի իրավապայմանագրային դաշտ կստեղծվի»:
«Հրապարակ» թերթը գրում է. «Հոկտեմբերի 17-ին Մեղրիի ընտրություններից հետո ավագանու 15 մանդատից 6-ը բաժին է ընկել «Հանրապետություն», 5-ը՝ ՔՊ, 2-ական մանդատ՝ Ազատական եւ «Ապրելու երկիր» կուսակցություններին։ Որեւէ ուժ չի ստացել բացարձակ մեծամասնություն, իսկ համայնքի ղեկավարի ընտրությանը 8 կողմ է հարկավոր։ Երեկ մեզ հետ զրույցում ՔՊ թեկնածու, համայնքի ղեկավարի ԺՊ Արարատ Թումանյանն ասել էր, թե բանակցում են բոլորի հետ, որ ՔՊ-ից լինի համայնքապետը՝ «բանակցությունները դրական ընթացք ունեն»։ Սակայն պարզվեց, որ նա փորձել է ցանկալին իրականության տեղ անցկացնել: Երեկ համաձայնության եկան «Հանրապետությունը» եւ Ազատականը` պայմանավորվելով 5 տարվա պաշտոնավարումը կիսել․ 2,5 տարի՝ մեկը, 2,5՝ մյուսը»:
«Հայաստանի Հանրապետություն» թերթը գրում է. «2021 թ. առաջին կիսամյակի ամփոփված տվյալներով` Հայաստանում ծնվել է 17.211 երեխա, այն դեպքում, երբ նախորդ տարվա նույն ժամանակահատվածում այդ թիվը 15.893 էր: Աճն էական է եւ շատ նշանակալի նախորդ՝ ճգնաժամային տարվա երկրորդ կիսամյակից հետո: Հայաստանից արտագաղթի որոշակի հոսքի պայմաններում նման ցուցանիշի գրանցումը խոստումնալից ու ուրախացնող հանգամանք է: Նշանակալից է նաեւ մեկ այլ ցուցանիշ` այս տարվա 8 ամիսներին արձանագրվել է 14.359 ամուսնություն: Այս թվերն առաջին հերթին վկայում են մեր ժողովրդի ամուր կամքի եւ պայքարող ոգու մասին, հաստատում 44-օրյա պատերազմից հետո արարելու եւ նորովի հզոր Հայաստան կառուցելու վճռականությունը»:
«Հրապարակ» թերթը գրում է. «Անցած շաբաթ օրը Արմավիրի Բամբակաշատ համայնքում տեղի է ունեցել ԶՈՒ ԳՇ պետ Արտակ Դավթյանի եղբոր հոգեհանգստի արարողությունը, որին մասնակցել են նախկին եւ ներկա պաշտոնյաներ՝ ԳՇ նախկին պետ Օնիկ Գասպարյանը, գեներալ-լեյտենանտ Հայկազ Բաղմանյանը, ՊՆ նախկին եւ ներկա պաշտոնյաներ։ Դավթյանին ցավակցելու է գնացել նաեւ Նիկոլ Փաշինյանը: Ներկաներից մեկից տեղեկացանք, որ Փաշինյանը երկար չի մնացել, մտել եւ արագ դուրս է եկել` չի շփվել որեւէ մեկի հետ: Իսկ Դավթյանի եղբայրը մահացել է կորոնավիրուսից»:
