«Արթուն ենք» շարժումը ՀՀ վարչապետ Նիկոլ Փաշինյանին անվստահություն հայտնելու նպատակով պատգամավորներին, այդ թվում՝ իշխանական, նամակներ է ուղարկել: Խորհրդարանում Փաշինյանին անվստահություն հայտնելու որոշման նախագիծը քննարկման դնելու համար անհրաժեշտ է առնվազն 36 պատգամավորի ստորագրություն: Ընդդիմադիր երկու խմբակցությունները՝ «Հայաստան»-ն ու «Պատիվ ունեմ»-ը, միասին ունեն 34 պատգամավոր: «Պատիվ ունեմ»-ի վեց պատգամավոր պատրաստ է նախաձեռնել այդ գործընթացը: «Հայաստան» խմբակցությունն այս պահին դա իրատեսական չի համարում:
Armenia Today-ի նկարահանող խումբը երևանցիներից հետաքրքրվել է, թե ինչպե՞ս են վերաբերվում այս ծրագրերին և հավատո՞ւմ են արդյոք նախաձեռնության հաջողությանը:
Հարցման մասնակիցների մի մասը կողմ էր նախաձեռնությանը, մյուսը չէր հետաքրքրվում քաղաքականությամբ:
«Մեկ տարի հետո ընտրություններ տեղի կունենան, ամեն մարդ իր կարծիքն այդ ժամանակ կարտահայտի։ Կարծում եմ՝ փողոց դուրս գալու կարիք չկա»,- ասել է քաղաքացիներից մեկը:
Ոմանց կարծիքով՝ Փաշինյանը պետք է մնա իշխանության՝ իմփիչմենթի կարիք չկա։ Նրանք կասկած հայտնեցին, որ իշխանափոխությունը կարող է դրական արդյունքի բերել:
«Իրենից լա՞վը պետք է գա։ Ինչ պետք է անի։ մենք մեր երկիրը չենք սիրում, երբ նման քայլերի ենք գնում»,- նշեց քաղաքացիներից մեկը:
Հարցման այն մասնակիցները, որոնք աջակցում են վարչապետին, վստահ են, որ Փաշինյանին չպետք է խանգարել, և որ նրա «անհաջողությունների պատճառը նրա հասցեին մշտական քննադատություններն են»:
«Այդ մարդն անում է՝ ինչ կարողանում է։ Մենք էլ խանգարում ենք, կռկռում ենք, նավսում ենք։ Մեզ հարկավոր է լինել լավ քաղաքացի»,- ասաց մեկ այլ քաղաքացի:
Քաղաքացիներից մեկն էլ նշեց. «Փաշինյանը լավն է, որ չխանգարեն՝ լավ կլինի»։ Մի կին էլ նշեց, որ «Փաշինյանն ազնիվ է, ժողովուրդն է վատը»։
Մեկ այլ մասնակից էլ ասաց, որ հույս է կապում գործընթացը շրջանառության մեծ դրած քաղաքական ուժերի հետ և կարծում է, որ նրանք կհաջողեն։ Քաղաքացիներից մեկն էլ նշեց, որ հիասթափված է քաղաքական ուժերից, այդ թվում՝ Փաշինյանից։ Մի տղամարդ էլ կարծում է, որ իմփիչմենթի միջոցով հնարավոր չէ հեռացնել Փաշինյանին, քանի որ նա «իր ձեռքին է կենտրոնացրել ուժային կառույցները»։
Մանրամասները կարող եք դիտել Armenia Today-ի տեսանյութում։
