Սամվել Կարապետյանի պաշտպանության խումբը հայտնել է նրան առաջադրված նոր մեղադրանքի մասին

«Տաշիր» ընկերությունների խմբի նախագահ Սամվել Կարապետյանի պաշտպանության խումբը հայտարարել է գործարարի նկատմամբ ներկայացված նոր մեղադրանքի մասին, որն առնչվում է «փողերի լվացմանը», տեղեկանում ենք խմբի հայտարարությունից։

Փաստաբանները մեղադրանքն անհիմն են համարում։

«Կարապետյանին օրերս ներկայացվել է «մի քանի ընկերությունների գործունեության հետևանքով փողերի լվացման» ակնհայտ անհիմն նոր մեղադրանք՝ առանց որևէ տվյալի: Ակնհայտ է, որ Հայաստանում վերջին շրջանում «փողերի լվացումը» վերածվել է ամենատարածված մեղադրանքի և պարբերաբար կիրառվում է բացառապես քաղաքական հաշվեհարդարի համատեքստում»,- ասված է հայտարարության մեջ։

Պաշտպանության խումբը շեշտել է, որ Կարապետյանի կողմից որևէ գործողություն չկա, ինչը կարող էր առնչվել բարերարին մեղսագրվող արարքի հետ։

«Ավելին, ստացվում է, որ մեղադրանք է ներկայացվել ուղիղ կամ անուղղակի մասնակցության, ենթադրյալ միջոցները թաքցնելու կամ խեղաթյուրելու հետ կապված որևէ իրողության բացակայության պայմաններում: Ուշագրավ է, որ մեղադրանքում նկարագրված գործողություններում չի նշվել կառավարչական բնույթի որևէ որոշում, գույքի հետ որևէ առնչություն»,- ընդգծել է խումբը։

Փաստաբանները վերահաստատել են իրենց դիրքորոշումը, ըստ որի՝ գործարարին առնչվող ընդհանուր քրեական վարույթը քաղաքական բնույթ ունի։

Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր հնչեցնելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում: Հուլիսի 4-ին դատարանն անփոփոխ էր թողել Կարապետյանին կալանավորելու որոշումը։

Հուլիսի 4-ին ի աջակցություն Կարապետյանի տեղի ունեցած հանրահավաքին գործարարը փաստաբանների միջոցով կալանավայրից ուղերձ էր հղել՝ կոչ անելով միավորվել նոր քաղաքական ուժի շուրջ: Հուլիսի 14-ին գործարարը տեղեկացրել էր, որ քաղաքական թիմի ձևավորումը մեկնարկել է։

Կարդացեք նաև՝