«Դեմոկրատիա, օրենք և կարգապահություն» (ԴՕԿ) կուսակցության առաջնորդ Վարդան Ղուկասյանին ԱՄՆ-ում մեղադրում են մանկաղծության համար, «Հրապարակ»-ին հայտնել է կուսակցության նախագահ Անուշ Խուդավերդյանը։
Նա լրատվականին հայտնել է, որ դատական նիստը տեղի կունենա վաղը՝ մայիսի 28-ին:
«Գործը ծավալուն է, կարող է մի քանի օր տևել, ինչպես գիտենք, այսքան երկարաձգման պատճառը փաստերի առկայությունն էր, որ պետք է ապահովեինք: Սպասենք, տեսնենք, թե ինչ տեղի կունենա: Կարծում եմ՝ արդարությունն անպայման կհաղթի, քանի որ ՀՀ դատախազության կողմից Ղուկասյանի մասին ուղարկված հերյուրանքները ոչ մի կապ չունեն իրականության հետ»,- ասել է նա:
Խուդավերդյանը պարզաբանել է, որ շուրջ երկու տարի առաջ Ղուկասյանը տեսանյութ է հրապարակել, թե ինչպես է Գավառում մայրը երեխաներին ենթարկում սեռական բռնության, հետո նկարում այդ ամենը և վաճառում տեսանյութը։
«Ղուկասյանի հաղորդումից հետո այդ կինը կալանավորվել է, գուցե Ղուկասյանը չպետք է բաց տեսանյութը տեղադրեր, պետք է երեխաների դեմքը փակեր, նրա միակ սխալը դա էր, այժմ դա համարում են մանկապղծություն և տարածում են կեղծ տեղեկություններ, բայց Ղուկասյանը կանխել է բազմաթիվ մանկապղծություններ: Տեսնում էինք, թե ինչպես է եթերի ժամանակ զանգահարում տարբեր տեղեր, հարցեր լուծում»,- ասել է Խուդավերդյանը։
2023 թվականի օգոստոսի 18-ին սոցցանցերում երեխայի նկատմամամբ դաժան վերաբերմունքի մասին տեսանյութ էր հրապարակվել։ Ավելի ուշ ՀՀ ոստիկանությունը հայտնել էր, որ կինը հայտնաբերվել է, նա Գավառի 34-ամյա բնակչուհի է։ Վերջինիս նկատմամբ նախաձեռնվել էր քրեական վարույթ, օգոստոսի 19-ին նա ձերբակալվել էր։ Օգոստոսի 20-ին կինը կալանավորվել էր։
