«Պատիվ ունեմ» խմբակցության պատգամավոր, Երևանի նախկին քաղաքապետ Տարոն Մարգարյանին իրավապահները մեղադրում են դպրոցների և մանկապարտեզի հարակից հողատարածքներից հատվածներ օտարելու մեջ, որոնք չեն ծառայել ուսումնական նպատակներով, գրել է «Ժողովուրդ» օրաթերթը։
Թերթը հիշեցրել է, որ այդ գործը քննվում է 2018-ի օգոստոսից և գործով ներգրավված է 9 անձ: Ըստ հրապարակման՝ 2021թ. դեկտեմբերին քննիչները հրաժարվել են մի հանցակազմից, որը հիմա «նորից են փորձում առաջ քաշել»:
ԶԼՄ-ն ուշադրություն է հրավիրել այն հանգամանքի վրա, որ ներկայիս իշխանությունների օրոք ուսումնական հաստատություններին պատկանող տարածքները նույնպես փոխանցվում են մասնավոր կազմակերպություններին։ Մասնավորապես, 2021թ․ կառավարության որոշմամբ՝ Երևանի կենտրոնի Իսակով պողոտայի 13/12 հասցեի «Երևանի երաժշտական հ. 13 հատուկ դպրոց» ՊՈԱԿ-ին պատկանող տարածքը` 9446 քմ մակերեսով և 360 քմ մակերեսով կաթսայատան շինությունը վերցրել են դպրոցից ուղղակի վաճառքով՝ առանց աճուրդի, տրամադրել են «Արմենիա վայն գործարան» ընկերությանը, որը տարածքում բիզնես կենտրոն է կառուցել:
«Դարձյալ դպրոցին հարակից տարածքն ուսումնական նպատակին չի ծառայել, բայց այս դեպքում որևէ մեկը չի պատժվել, քանի որ իրավապահները հանցակազմ չեն տեսել»,- ասված է հրապարակման մեջ:
Հունվարի 11-ին «Ժողովուրդ»-ը գրել էր, որ վարչապետ Նիկոլ Փաշինյանը 2026 թվականի ընտրություններին ընդառաջ՝ հրամայել էր ձերբակալել իր ընդդիմախոսներին։ Ըստ թերթի՝ վարչապետը հանձնարարական էր տվել առաջիկայում գտնել, իսկ անհրաժեշտության դեպքում «ստեղծել» հիմքեր՝ գործեր հարուցելու և բոլոր նրանց ձերբակալելու, ովքեր փորձում են քննադատել իշխանություններին։
Մարտի 12-ին ՀՀ գլխավոր դատախազ Աննա Վարդապետյանը դիմել էր Հայաստանի խորհրդարան՝ պատգամավոր Հովիկ Աղազարյանին, ինչպես նաև Մարգարյանին անձեռնմխելիությունից զրկելու խնդրանքով։ Տեղեկությունն Armenia Today-ին հաստատել էր Դատախազության մամուլի ծառայությունը։
Աղազարյանի և Մարգարյանի նկատմամբ քրեական հետապնդում հարուցելու և նրանց անձեռնմխելիությունից զրկելու վերաբերյալ Ազգային ժողովի համաձայնության մասին որոշման նախագծերը հրապարակվել էին ԱԺ-ի պաշտոնական կայքում, սակայն հաջորդ նստաշրջանի օրակարգ չէին ընդգրկվել։ Երկու պատգամավորի գործն էլ վերաբերում է կոռուպցիոն գործարքներին։
