«Երևան ավտոբուս»-ի վարորդների հետ վիճաբանության առնչությամբ քրեական վարույթ է նախաձեռնվել, Armenia Today-ին հայտնել է Քննչական կոմիտեի խոսնակ Կիմա Ավդալյանը։
Վարույթը նախաձեռնվել է Քրեական օրենսգրքի 297-րդ հոդվածի 2-րդ մասի 1-ին կետով (մի խումբ անձանց կողմից խուլիգանություն, առավելագույն պատիժն ազատազրկում՝ 5 տարի ժամեկտով-խմբ․) և 195-րդ հոդվածի 2-րդ մասի 5-րդ կետով (մի խումբ անձանց կողմից ֆիզիկական ներգործությունը, առավելագույն պատիժն ազատազրկում՝ 2 ամիս ժամկետով):
ՔԿ խոսնակը տեղեկացրել է, որ կատարվում է նախաքննություն:
Փետրվարի 14-ին՝ ավելի վաղ, քաղաքապետարանից հայտնել էին, որ Երևանում 97 համարի ավտոբուսի վարորդի կողմից ուղևորներին վճարում կատարելու հորդորից հետո վարորդը ենթարկվել էր բռնության։
ՆԳՆ-ն ավելի ուշ տեղեկացրել էր, որ Նուբարաշենի բաժնում հաղորդում տված վարորդը հայտնել է, որ փետրվարի 14-ի առավոտյան ուղեվարձը չվճարելու պատճառով իր հետ վեճի են բռնվել երեք անծանոթ երիտասարդ, որոնցից մեկը բռունցքով հարվածել է իր դեմքին և մարմնի տարբեր հատվածներին` պատճառելով մարմնական վնասվածք։ Ըստ ՆԳՆ-ի՝ ընկերության մեկ այլ վարորդ, նկատելով գործընկերոջ հետ վիճաբանությունը, միջամտել է, և նույնպես ստացել մարմնական վնասվածք։ ՆԳՆ-ն հայտնել էր, որ երիտասարդներից երկուսի ինքնությունը պարզել են։
Երևանցիները փետրվարի 1-ից բոյկոտում են հասարակական տրանսպորտի ուղեվարձի 100 դրամից 150 դրամ թանկացումը։
2024 թվականի մարտի 12-ին Երևանի ավագանին ընդունել էր տոմսերի միասնական համակարգ ներդնելու նախագիծը, որն սկսել էր գործել 2025 թվականի հունվարի 1-ից։ Փետրվարի 11-ին Երևանի քաղաքապետարանն ընդլայնել էր տրանսպորտային արտոնություններից օգտվող քաղաքացիների շրջանակը։
