Փետրվարի 5-ի գիշերը Փարաքար խոշորացված համայնքի Մերձավան բնակավայրի ղեկավար Մհեր Ախտոյանի տան ուղղությամբ տեղի ունեցած հարձակման, մեկ անձի մահվան ու մեկի վիրավորվելու պատճառը կենցաղային հարցերն են, գրել է Shamshyan.com-ը՝ հղում անելով իր աղբյուրներին։
Կայքին հայտնի են դարձել միջադեպի մանրամասները և մասնակիցների ինքնությունը։
«Փետրվարի 5-ին՝ ժամը 00։40-ի սահմաններում, Մերձավանում հաշվառված 35-ամյա Տիգրան Մանուկյանը, 41-ամյա Գեորգի Մանուկյանը, Մերձավանում բնակվող 21-ամյա Արսեն Մարդոյանը, 22-ամյա Մարտիկ Բաղդասարյանը և Երևանում հաշվառված 29-ամյա Գրիգոր Օհանյանը կենցաղային հարցերի շուրջ վիճաբանել ու ծեծի են ենթարկել Մերձավանում բնակվող 22-ամյա Վլադիմիր Խդրյանին, որից հետո վիճաբանությունը շարունակվել է Մերձավան գյուղի Երևանյան 51 հասցեի դիմացի հատվածում»,- ասված է հրապարակման մեջ։
Լրատվականը հավելել է, որ վիճաբանությանը միացել են Խդրյանի մտերիմներ, Մերձավանի բնակիչ 29-ամյա, «Տըզ» մականունով հայտնի Արմեն Ղազարյանը, Մերձավանում հաշվառված 28-ամյա Արթուր Գալստյանը, 31-ամյա Մարզպետ Գալստյանը և մի քանի անձինք։
«Վիճաբանությունը վերածվել է ծեծկռտուքի, փոխադարձ հարվածներ են հասցրել, հնչել են հայհոյանքներ, որից հետո Ղազարյանն ինքնաձիգով կրակահերթ է արձակել նրանց ուղղությամբ, որի հետևանքով Օհանյանը կրծքավանդակի շրջանում ստացած հրազենային վիրավորումից տեղում մահացել է, իսկ Սերգեյ Նալբանդյանը նստատեղի շրջանում ստացել է հրազենային վնասվածք և տեղափոխվել «Վաղարշապատ» բժշկական կենտրոն»,- հավելել է կայքը։
«Հայկական ժամանակ»-ը գրել էր, որ փետրվարի 5-ի գիշերը զինված հարձակում էր տեղի ունեցել Մերձավանի ղեկավարի տան ուղղությամբ։ Ախտոյանի եղբայրը՝ Դավիթ Ախտոյանը, կայքին հայտնել էր, «զոհվածն իրենց հորաքրոջ որդին է, վիրավորը՝ ընկերը»: Ըստ Ախտոյանի՝ «վերջիններս փորձել են միջամտել, որ չմտնեն տուն»:
Ավելի ուշ Քննչական կոմիտեի խոսնակ Կիմա Ավդալյանն Armenia Today-ին տեղեկացրել էր, որ դեպքի առնչությամբ ՔԿ-ում քրեական վարույթ է հարուցվել։ ՔԿ խոսնակը հայտնել էր, որ Մերձավանում տեղի ունեցած սպանության վարույթով 2 ձերբակալված կա։
