Սերժ Սարգսյանի խնամի Արա Մինասյանը և նրա կինը հրավիրվել են ՀՀ գլխավոր դատախազություն

Սերժ Սարգսյանի խնամի Արա Մինասյանը և նրա կինը՝ Արմինե  Հասրաթյանը հրավիրվել են ՀՀ գլխավոր դատախազություն, ասված է ՀՀ արդարադատության նախարարության Azdarar.am կայքում զետեղված ծանուցագրերում։

«Ղեկավարվելով «Ապօրինի ծագում ունեցող գույքի բռնագանձման մասին» օրենքի 16-րդ և 17-րդ հոդվածներով ծանուցում եմ, որ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունում Ձեզ պատկանող գույքի առնչությամբ իրականացվում է ուսումնասիրություն, որի արդյունքում կազմվել է ամփոփագիր: Նշվածի հիման վրա՝ Ձեր անվամբ հաշվառված գույքը հանդիսանում է բռնագանձման առարկա»,- ասված է Արա Մինասյանին ուղարկված ծանուցման մեջ։

Նշվում է, որ Մինասյանն ու կինը իրավունք ունեն ծանուցագիրը ստանալու պահից մեկ ամսվա ընթացքում ներկայանալ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն՝ ծանոթանալու գործի նյութերին, ներկայացնելու դիրքորոշում, ինչպես նաև հայտարարագիր՝ համաձայն ՀՀ կառավարության 2020թ. դեկտեմբերի 10-ի N 2044 Ն որոշման՝ միաժամանակ, հայտնելով, որ ներկայանալ անհրաժեշտ է սույն թվականի հուլիսի 25 ին՝ ժամը 11:00-ին։