SHAMSHYAN.com-ի տեղեկություններով՝ փետրվարի 4-ից ոստիկանության կենտրոնական բաժնի կողմից հետախուզում է հայտարարվել Երևան քաղաքի Կենտրոն վարչական շրջանում հաշվառված 41-ամյա Բորիս Ավագյանի նկատմամբ։
Armenia Today-ը տեղեկությունը ճշտելու նպատակով կապ հաստատեց ոստիկանության լրատվության բաժնի հետ։ Այստեղից մեզ փոխանցեցին դիմել նախաքննական մարմին։
Նշենք, որ ըստ SHAMSHYAN.com-ի՝ վերջինս հետախուզվում է ՀՀ քրեական օրենսգրքի 190 հոդվածի 3-րդ մասի 1-ին կետի (հանցավոր ճանապարհով ստացված գույքն օրինականացնելը, փողերի լվացումը, առանձնապես խոշոր չափերով) մեղադրանքով։
Ավելի վաղ, Սանկտ Պետերբուրգի իրավապահ մարմինները քաղաքի ռեստորաններից մեկում ձերբակալել են հետախուզման մեջ գտնվող Բորիս Ավագյանին։
Հիշեցնենք, որ 2021 թվականի ապրիլին Արցախի ներքին գործերի նախարար Կարեն Սարգսյանի հրամանով Բորիս Ավագյանն ազատվել է Արտակարգ իրավիճակների պետական ծառայության (ԱԻՊԾ) տնօրենի տեղակալի պաշտոնից Երևան քաղաքում վերջինիս կողմից տրված ասուլիսի ընթացքում հնչեցրած կարծիքների համար։ Համաձայն հաղորդագրության՝ Ավագյանն իր կողմից կազմակերպված ասուլիսի և ծառայության անունից հանդես գալու մասին տեղյակ չի պահել վերադաս ղեկավարությանը և խոսել է իր լիազորությունների շրջանակներից դուրս թեմաներից։
