Արցախյան շարժման էջը փակելու վերաբերյալ հայտարարությունը Բաքվի հրամանով էր և հասցեագրված էր Հայաստանի ներքին լսարանին, Armenia Today-ի «Խոսում ենք գլխավորի մասին» հաղորդմանը նշել է քաղաքագետ Հրանտ Միքայելյանը՝ անդրադառնալով Ազգային ժողովում վարչապետ Նիկոլ Փաշինյանի՝ «Ղարաբաղյան շարժումը չշարունակելու» հայտարարությանը։
Քաղաքագետի խոսքով՝ այս թեզն ադրբեջանական նարատիվ է և առաջին անգամ չէ, որ ՀՀ իշխանությունները նման թեզեր են տարածում։
«Ներկայիս իշխանություններն անդադար զբաղվում են ադրբեջանական և հակահայկական նարատիվներ տարածելով։ Օրինակ են Ցեղասպանության փորձը արդարացնելու բազմաթիվ հայտարարությունները, Հայոց պատմության գրքերը վերաձևակերպելու փորձերը։ Կամ՝ Ադրբեջանի նախագահ Իլհամ Ալիևն սկսում է խոսել այն մասին, որ Հայաստանը պետք է Սահմանադրությունը փոխի, և հաջորդ օրը Փաշինյանը դուրս է գալիս և նույն կոչով է հանդես գալիս»,- ասել է քաղաքագետը։
Անդրադառնալով Ադրբեջանի՝ մարտի 16-ից պարբերաբար բնույթ կրող այն հայտարարություններին, թե, իբր, Հայաստանի հետ սահմանին իր դիրքերի ուղղությամբ կրակոցներ կան, Միքայելյանն ընդգծել է, որ Բաքուն այս գործիքը կիրառում է մի քանի նպատակով։
«Բաքուն այս գործիքը կիրառվում է՝ ցույց տալու, որ հակամարտությունը սառեցված և լուծված չէ, իսկ ուժային լուծումը միշտ սեղանի վրա է։ Բաքուն ցույց է տալիս բոլորին, որ պատերազմ կարող է լինել կամ պատերազմը շարունակվում է։ Ադրբեջանն այս միտքն է հիմնականում հասցնում՝ ասելով, որ պատրաստ է պատերազմ սկսել։ Ադրբեջանն ուղղակի ցույց է տալիս բոլորին, որ պատրաստ է իր նպատակներին հասնել ուժային ճանապարհով»,- նկատել է նա։
Այս համատեքստում քաղաքագետը հայկական կողմի արձագանքը ոչ միայն անբավարար է համարում, այլև կարծում է, որ «հայկական կողմը չի խանգարում Ադրբեջանին իր հարցերը լուծել ուժով»։
Քաղաքագետի հետ «Խոսում ենք գլխավորի մասին» հաղորդումը կհեռարձակվի ուրբաթ՝ ապրիլի 4-ին՝ ժամը 21։00-ին՝ Armenia Today-ի Youtube-ի ալիքով։
