Ռուսաստանում՝ Լենինգրադի մարզում, մայիսի 4-ին նեոնացիստական «Ռուսական համայնք» շարժման անդամները ներխուժել են Վսևոլոժսկ քաղաքի բնակարաններից մեկը։ Տեղական մի շարք լրատվամիջոցների և Տելեգրամ ալիքների հաղորդմամբ՝ սրանից հեռո հրդեհ է բռնկվել, որի արդյունքում զոհվել է Հայաստանի 37-ամյա քաղաքացի։
Արտակարգ իրավիճակների նախարարության տվյալներով՝ հրդեհը բռնկվել է Լենինգրադյան փողոցի բնակարաններից մեկում։ Հայտնաբերվել է տղամարդու դի, իսկ պատուհանի տակ՝ 24-ամյա մի աղջիկ՝ ծանր վիճակում։
ՌԴ քննչական կոմիտեն քրեական գործ է հարուցել է «անզգուշությամբ մահ պատճառելու» հոդվածով, որը սպանություն չի որակավորվում:
«Ֆոնտանկա» Տելեգրամ ալիքի փոխանցմամբ՝ դեպքի օրը բնակարան են ներխուժել «Ռուսական համայնքի» անդամները։ Այդ մասին պատմել է բնակարանի սեփականատերը։ Նրա խոսքով՝ անհայտ անձինք, ներկայանալով ոստիկաններ, կոտրել են դուռը, գազ ցողել և էլեկտրաշոկեր կիրառել ներսում գտնվող տղամարդու նկատմամբ։ Երբ բնակարանի սեփականատերը հասել է դեպքի վայր, աստիճանավանդակում տեսել է սև հագուստով, դիմակներով և «Ռուսական համայնքի» խորհրդանիշներով մի խումբ տղամարդկանց։
