«Սուրբ Գրիգոր Լուսավորիչ» ԲԿ-ի բուժական հարցերով փոխտնօրեն Պետրոս Մանուկյանը խոսել է Նոր Նորք վարչական շրջանի ղեկավար Տիգրան Տեր-Մարգարյանի մասնակցությամբ ծեծկռտուքից տուժած ընդդիմադիր ակտիվիստ Արթուր Չախոյանի վիճակի մասին:
«Աչքի շրջանում ունի փոքր հեմատոմա, փոքր սալջարդեր։ Առկա է մեզ անհանգստացնող գլխի վնասվածք, որը դինամիկ հսկողության կարիք ունի»,- նշել է բժիշկը:
Հիվանդի հետագա դինամիկ հսկողության և նրա վիճակի ռեալ գնահատման համար, Մանուկյանի խոսքով, առաջարկվել է հիվանդանոցային հսկողություն և բուժում:
Ապրիլի 30-ին Նոր Նորքի թաղապետարանում ծեծկռտուք և վեճ էր տեղի ունեցել։ Նոր Նորք վարչական շրջանի ղեկավար Տիգրան Տեր-Մարգարյանը և մի քանի այլ անձ, որոնք, ենթադրաբար, թաղապետարանի աշխատակիցներն են, ըստ ԶԼՄ-ներում առկա տեսանյութերի, հայհոյել ու հարվածել էին ակտիվիստ Արթուր Չախոյանին, որին ավելի ուշ ոստիկանության Նոր Նորքի բաժանմունքից տեղափոխել էին «Սուրբ Գրիգոր Լուսավորիչ» ԲԿ:
ՆԳՆ-ից Armenia Today-ին տեղեկացրել էին, որ միջադեպի առնչությամբ 6 ձերբակալված կա։ Ավելի ուշ ՔԿ-ն հայտնել էր, որ դեպքի առթիվ քրեական վարույթ է նախաձեռնվել։
Չախոյանն ապրիլի 29-ին գրել էր, որ գնալու է թաղապետարան՝ հանրային քննարկմանը մասնակցելու նպատակով: Նա ցանկացել էր թաղապետի հետ քննարկել իր բնակության վայրի հարևանությամբ 18 հարկանի բնակելի շենք կառուցելու անթույլատրելիությունը։ Չախոյանին ասվել էր, որ հանդիպումը հնարավոր է միայն առանց տեսախցիկների, ինչին ակտիվիստը համաձայնել էր։ Այնուհետև սկսվել էր ծեծկռտուքը:
Մանրամասները՝ տեսանյութում։
