Գիշերը շտապօգնության բժիշկներ են բռնության ենթարկվել, հայտնել է ՀՀ առողջապահության նախարար Անահիտ Ավանեսյանը։
«Շտապօգնության մեր բժիշկները շտապել էին կանչի` անհրաժեշտ բուժօգնություն տրամադրելու»,- գրել է նախարարը։
Ավանեսյանը նշել է, որ իրենց մասնագիտական պարտքը կատարող բուժաշխատողների հանդեպ ոտնձգության դեպքերը, ցավոք, շարունակվում են, ինչը նա դատապարտելի է համարել։
«Վստահ եմ՝ այս դեպքերին իրավաչափ գնահատական լինելու է, և այդ հարցում ինքս լինելու եմ հետևողական: Բուժաշխատողների հանդեպ ուժի, բռնության դրսևորումներն իրավահարգության կոպիտ խախտում են, անթույլատրելի վարքագիծ և, այո´, պիտի արժանանան նաև հասարակական պարսավանքի»,- հավելել է նա։
Փետրվարի 21-ին ՀՀ ՆԳՆ-ն տեղեկացրել էր, որ Շիրակի մարզի Ազատան գյուղում տարեց տղամարդու որդին մոխրամանով հարվածել էր հորն օգնություն ցույց տվող բուժաշխատողին։ Ոստիկանները ձերբակալել էին բժշկին բռնության ենթարկած 44-ամյա տղամարդուն։
Shamshyan.com-ը գրել էր, որ բռնության ենթարկված բուժակը Մհեր Քոլոյանն է, իսկ նրա նկատմամբ ոտնձգություն կատարողը՝ Ախուրյանի նախկին ոստիկանապետերից մեկի ազգականը:
