Զանգեզուրի պղնձամոլիբդենային կոմբինատը (ԶՊՄԿ) 2024 թվականի արդյունքներով գլխավորել է Հայաստանի 1000 խոշոր հարկատուների ցանկը, հայտնել են ընկերությունից։
Կոմբինատն այս ցուցակում առաջին տեղն է զբաղեցնում արդեն 4-րդ տարին անընդմեջ։ ԶՊՄԿ-ն անցած տարվա ընթացքում պետական բյուջե է վճարել շուրջ 102 մլրդ դրամ հարկ։ Այն 31 մլրդ դրամով ավելի է, քան 2023 թվականին։ Ընկերությունն իր հաղորդագրության մեջ նշել է, որ 2018, 2021, 2022 և 2023 թվականների ամենախոշոր հարկատուն էր:
ՊԵԿ-ի տվյալները վկայում են, որ Հայաստանի խոշորագույն հարկատուների եռյակում ընդգրկվել են նաև «Մոբայլ սենթր արթ» և «Գրանդ Տոբակո» ընկերությունները: «Մոբայլ սենթր արթը» բջջային հեռախոսների խանութների խոշորագույն ցանց է Հայաստանում, իսկ «Գրանդ Տոբակոն» արտադրում է ծխախոտ։
Խոշոր հարկատուների ցանկում «Գազպրոմ Արմենիա» ՓԲԸ-ն զբաղեցրել է 4-րդ տեղը՝ պետբյուջե վճարելով 46,8 մլրդ դրամ հարկ, իսկ խոշոր հարկատուների հնգյակը եզրափակել է «Փրիթի Ուեյ» ՍՊԸ-ն:
2024 թվականի հոկտեմբերին ՊԵԿ-ը տարվա երրորդ եռամսյակի արդյունքներով ԶՊՄԿ-ին համարել էր խոշորագույն հարկատու։ 2024 թվականի դեկտեմբերին վարչապետ Նիկոլ Փաշինյանը հայտարարել էր, որ ԶՊՄԿ-ն ՀՀ պետական բյուջե էր փոխանցել 33,25 մլրդ դրամ՝ որպես կառավարության շահաբաժին։
