ՀՀ պետական եկամուտների կոմիտեն հայտնել է ԵԱՏՄ-ից ներմուծվող ապրանքների նկատմամբ սահմանային վերահսկողության խստացման մասին:
Կոմիտեն պարզաբանել է, որ մինչ այժմ խնդրո առարկա այն բեռները, որոնք ԵԱՏՄ երկրներից ուղևորվում էին Հայաստան, բայց միևնույն ժամանակ միության անդամ չհանդիսացող երրորդ երկրների տարածքներում փոխադրման ժամանակ ենթարկվում էին բեռնաթափման, փոխադրման կամ այլ գործողությունների, համարվում էին միության ապրանքներ, և մաքսային մարմինները սահմանափակվում էին նախազգուշացմամբ:
«Նշված մոտեցումը համապատասխան ապրանքներ տեղափոխողների մոտ հանգեցրել է կարգապահության թուլացման և հնարավոր չարաշահումների տեղիք է տվել»,-հայտնել են ՊԵԿ-ում։
ՊԵԿ-ը հայտնել է նոր մոտեցումներ կիրառելու մասին, համաձայն որոնց․
-խնդրո առարկա ապրանքները չեն ճանաչվի որպես միության ապրանք, եթե առանց մաքսային մարմնի թույլտվության ԵԱՏՄ անդամ չհանդիսացող պետության տարածքում բեռնաթափվել, փոխաբեռնվել (վերաբեռնվել) և դրանց հետ կատարվող բեռնային այլ գործողություններ են կատարվել, կամ փոխադրող տրանսպորտային միջոցն է փոխարինվել, բացառությամբ այն դեպքերի, երբ այս գործողություններն իրականացվել են վթարի կամ անհաղթահարելի ուժի ազդեցության հետևանքով:
-Այն պարագայում, երբ Միության անդամ երկրից ՀՀ տեղափոխված ապրանքները չեն համապատասխանի այդ ապրանքների վերաբերյալ տարանցման հայտարարագրին և դա կհանգեցնի այդ ապրանքների վերաբերյալ «մաքսային տարանցում» մաքսային ընթացակարգով ձևակերպված հայտարարագրի բացակայության, այդ ապրանքները չեն համարվի միության ապրանքի կարգավիճակ ունեցող, ուստի նման պայմաններում դրանք ենթակա կլինեն ձևակերպման որպես երրորդ երկրի ապրանք։ Սահմանված կարգով որպես երրորդ երկրի ապրանք չձևակերպվելու դեպքում՝ դրանք ենթակա կլինեն արգելապահման։
Միաժամանակ, կոմիտեն տեղեկացրել է, որ իրականացվող վարչական վարույթի ընթացքում տնտեսվարողը զրկված չի լինի խնդրո առարկա ապրանքները ԵԱՏՄ ապրանքի կարգավիճակ ունենալու վերաբերյալ այլ ապացույցներ ներկայացնելու հնարավորությունից։
