Հայկական որակյալ արտադրանքը շատ լավ է վաճառվում Չինաստանում, այս մասին Armenia Today-ի հարցին ի պատասխան հայտնեց ՀՀ-ում ՉԺՀ դեսպանության առևտրատնտեսական գծով կցորդ Ցայ Չունը։
«Առևտրատնտեսական համագործակցությունը Հայաստանի և Չինաստանի միջև գնալով աճում է և հեռանկարներն էլ ավելի մեծ են։ Ցանկանում եմ նշել, որ նախորդ տարվա ավարտին մոտ 70․000 հայկական կոնյակ է արտահանվել Չինաստան՝ ստանալով 1․5 մլն գումարի եկամուտ, որը երկկողմ հարաբերությունների ընթացքում արձանագրված ամենամեծ ցուցանիշն է։ Սա վկայում է, որ հայկական որակյալ արտադրանքը շատ լավ է վաճառվում Չինաստանում, օրինակ՝ հայկական մեղրը։
Որքանով ես գիտեմ, Հայաստանն արտադրում է մոտ 3000-4000 տոննա մեղր, և մենք ցանկանում ենք, որ Չինաստանում է՛լ ավելի շատ այսպիսի արտադրանքներ լինեն։ Իրականում՝ արտահանումը դժվար է, քանի որ երկրների միջև տարածությունը շատ մեծ է։ Մենք շատ ենք ցանկանում, որ այսպիսի որակյալ արտադրանքներ՝ նամանավանդ մեղրը, է՛լ ավելի շատ լինեն, որպեսզի չինացի ժողովուրդն ավելի լավ ծանոթանա հայկական ապրանքներին»,- ասաց նա։
Ի պատասխան Armenia Today-ի հարցին՝ ՀՀ-ում Չինաստանի դեսպանը նշեց, որ տնտեսության ոլորտում երկու երկրների հարաբերություններն արագորեն աճում են։
«Չինաստանը և Հայաստանը փոխադարձ վստահությամբ բարեկամ երկրներ են և փոխշահավետ համագործակցությամբ նաև գործընկերներ։ Տնտեսության ոլորտում երկու երկրների հարաբերություններն արագորեն աճում են և, կարծում եմ, շատ բարձունքների են հասել։ Տարբեր համագործակցության նոր ծրագրեր կան, որոնցից են, օրինակ, ճանապարհների և ֆոտովոլտային էլեկտրակայանների կառուցումը, ենթակայանների և ջրամբարների վերափոխումը, կաուչուկի արտադրությունը։ Նաև շատ լավ է ընթանում Չինաստանի աջակցությամբ Հայաստանում կառուցված հայ-չինական բարեկամության դպրոցի աշխատանքը, կա Հայաստանի հանրային հեռուստատեսության տաղավարի աջակցության ծրագիր։ Ունենք նաև մարդկային ռեսուրսների ուսուցման անվճար աջակցության ծրագրեր»,- ընդգծեց դեսպանը։
Մանրամասները՝ տեսանյութում։
