Սեպտեմբերին Հայաստանի պատմության թանգարանում կբացվի Լուվրի թանգարանի հետ համատեղ ցուցադրություն, Ազգային Ժողովում հայտնել է ԿԳՄՍ նախարար Ժաննա Անդրեասյանը։
Նրա խոսքով՝ Հայաստանի ազգային պատկերասրահն, իր հերթին, ցուցադրություն կկազմակերպի Ֆրանսիայում։ Ցուցադրության հետ կապված մանրամասներ, սակայն, նախարարը չի հայտնել:
Անդրեասյանը հավելել է, որ Հայաստանի պատմության թանգարանում Բրիտանական թանգարանի հետ համատեղ իրականացված «Մայր աստվածություն. Անահիտից Մարիամ» շուրջ 6-ամսյա ցուցադրությունը Հայաստանի պատմության ամենամեծ թվով այցելուներ ունեցող ցուցադրությունն էր՝ ավելի քան 55 հազար այցելու։
Ք․ ա․ II-I դդ․ թվագրվող Անահիտ աստվածուհու արձանից պահպանված բրոնզե գլուխն ու ձեռքը Բրիտանական թանգարանից Հայաստանի պատմության թանգարան էին տեղափոխվել 2024 թվականի սեպտեմբերին։ Ցուցադրությունը գործել էր մինչև ապրիլի 10-ը։
