Սյունիքի մարզի Կապան քաղաքում պաշտոնապես իր դռներն է բացել Սենթ Էթիենի անվան ֆրանկոֆոն կենտրոնը, հայտնում է Կապանի համայնքապետարանը։
Կենտրոնի բացմանը ներկա էին Կապան համայնքի ղեկավար Գևորգ Փարսյանը, Սենթ Էթիենի քաղաքապետ Գաել Պերդրիոյի գլխավորած պատվիրակությունը, ԱԺ պատգամավորներ, Հայաստանում Ֆրանսիայի դեսպանատան, Սյունիքի մարզպետի աշխատակազմի, ԶՊՄ կոմբինատի ներկայացուցիչներ, Կապան համայնքի ավագանու անդամներ, հյուրեր։
Փարսյանը, ընդգծելով կենտրոնի կարևորությունը, վստահություն է հայտնել, որ այն իր գործունեությամբ խթանելու է ֆրանսերեն լեզվի ուսուցման ու տարածմանը, ինչպես նաև ֆրանսիական հարուստ գրականությանն ու մշակույթին հաղորդակից լինելուն:
«Հայերը ֆրանսիացիների հետ կապված են պատմության խորքից եկող բարեկամությամբ, որը հիմնված է համընդհանուր արժեքների, փոխադարձ հարգանքի և վստահության վրա։ Այսօր ուրախությամբ եմ արձանագրում, որ այդ հարաբերությունները չեն սահմանափակվել միայն պետական մակարդակով, այլ դրսևորվել են նաև մեր համայնքների միջև համագործակցությամբ, որը մեզ համար չափազանց արժեքավոր է»,- ասել է նա։
Պերդրիոն, իր հերթին, հույս է հայտնել, որ կենտրոնը կդառնա նոր հնարավորությունների, շփման և առաջընթացի վայր։ «Թող այն լինի մեր բարեկամության արտահայտությունը, մի կամուրջ, որը կապում է մեր պատմություններն ու մեր ապագան»,- նշել է նա։
