ՀՀ կրթության, գիտության, մշակույթի և սպորտի նախարարության աջակցությամբ «Սևան» երիտասարդական ակումբ» ՀԿ–ն Սևանի թիվ 1 հանրային լողափում և Սևանի քաղաքային զբոսայգում անցկացրել է «Սևան» միջազգային 6-րդ երաժշտական փառատոնը։
Ինչպես հայտնում են ՀՀ ԿԳՄՍ նախարարությունից, փառատոնի «Փոխենք երաժշտությամբ» կարգախոսն այս տարի Սևանի ափին համախմբել էր 18 երաժշտական խմբերի Հայաստանից, Ռուսաստանից, Ավստրիայից, Ֆրանսիայից, ավելի քան 50 կամավորների և բազմաթիվ երաժշտասերների։
Նշվում է, որ «Սևան» միջազգային երաժշտական փառատոնի իրականացմանն աջակցել են նաև ՀՀ շրջակա միջավայրի նախարարությունը, Գեղարքունիքի մարզպետարանը, Սևանի համայնքապետարանը, «Դի վի վի ինթերնեյշնլ» հայաստանյան գրասենյակը, Հայաստանի պետական ֆիլհարմոնիան, GIZ-ի «EU4Sevan» ծրագիրը, «Սևան» ազգային պարկը:
Փառատոնը կազմակերպվում է 2015 թվականից։ Ծրագրի նպատակն է խթանել ժամանակակից երաժշտության տարածումը, Գեղարքունիքի մարզում զարգացնել մշակութային զբոսաշրջությունը, հոգատար վերաբերմունք ձևավորել Սևանա լճի նկատմամբ:
