Իրանի և հարակից որոշ երկրների օդային տարածքների փակմամբ պայմանավորված՝ Հայաստանի Հանրապետության քաղաքացիներ և ազգությամբ հայեր հայտնվել են Բաքի օդանավակայանում, իսկ ադրբեջանցիներ՝ Երևանում, հայտնում է ՀՀ ԱԱԾ-ն:
Ազգային անվտանգության ծառայությունը նշել է, որ մի շարք միջազգային ավիաթռիչքներ հարկադրված վայրէջքներ են կատարել «Զվարթնոց» միջազգային օդանավակայանում և տարածաշրջանի այլ երկրների օդանավակայաններում։
«Այս հանգամանքի բերումով ՀՀ քաղաքացիներ և ազգությամբ հայեր հայտնվել են Ադրբեջանի մայրաքաղաք Բաքվի օդանավակայանում։ Միևնույն ժամանակ, նույն իրավիճակով պայմանավորված, Ադրբեջանի քաղաքացիներ հայտնվել են «Զվարթնոց» օդանավակայանում։ Ստեղծված իրավիճակով պայմանավորված՝ ՀՀ պետական կառույցներն իրականացնում են հետևողական աշխատանք»,- ասված է հաղորդագրության մեջ:
Իսրայելի պաշտպանության բանակը ռազմաօդային ուժերի ավելի քան 200 կործանիչի կիրառմամբ հունիսի 13-ի գիշերը հարվածներ է հասցրել Իրանի տարածքում գտնվող ավելի քան 100 թիրախի, այդ թվում՝ իրանցի բարձրաստիճան զինվորականների թաքստոցների ուղղությամբ: Fars գործակալության տվյալներով՝ Թեհրանում առնվազն տասը պայթյուն է գրանցվել։
