Ռուսաստանը և ԱՄՆ-ը Ստամբուլում կայացած բանակցությունների ժամանակ համաձայնության են եկել մշակել «ճանապարհային քարտեզ»՝ ամերիկյան իշխանությունների կողմից բռնագրավված վեց ռուսական դիվանագիտական օբյեկտները վերադարձնելու համար, հայտնել է Ռուսաստանի արտաքին գործերի նախարարությունը։
Ռուսաստանի պատվիրակության ղեկավար, ԱՄՆ-ում Ռուսաստանի դեսպան Ալեքսանդր Դարչիևը «հատկապես ընդգծել է այս ուղղությամբ անհապաղ գործնական քայլերի կարևորությունը, այդ թվում՝ նշված օբյեկտներ Ռուսաստանի ներկայացուցիչների անհապաղ մուտքը՝ պատճառված վնասը ստուգելու և գնահատելու համար», – ասվում է ԱԳՆ հաղորդագրության մեջ։
Բանակցություններին ԱՄՆ-ը ներկայացրել է Ռուսաստանի և Կենտրոնական Եվրոպայի հարցերով պետքարտուղարի օգնականի տեղակալ Սոնատա Քալթերը։
Պատվիրակությունները նաև պարտավորվել են ապահովել երկու երկրների դիվանագիտական առաքելությունների համար անխափան բանկային և ֆինանսական ծառայությունների մատուցումը։
Կողմերը համաձայնել են «փոխադարձաբար ընդունելի լուծումների հասնել» խորհրդակցությունների հաջորդ փուլի ընթացքում, որի ժամկետները դեռևս համաձայնեցման փուլում են։
Պետդեպարտամենտը հայտարարել է, որ Ստամբուլում կայացած բանակցությունները «կառուցողական» էին։ Միացյալ Նահանգները մտահոգություն է հայտնել Մոսկվայում դեսպանատան համար տեղական անձնակազմ վարձելու արգելքի վերաբերյալ, որը «հիմնական խոչընդոտ» է դիվանագիտական ներկայացուցչությունում անձնակազմի կայուն մակարդակը պահպանելու համար։
Ռուսաստանի և Միացյալ Նահանգների միջև բանակցությունները տեղի են ունեցել Ստամբուլում գտնվող Ռուսաստանի գլխավոր հյուպատոսությունում և տևել են գրեթե վեց ժամ։ Վերջին անգամ երկու երկրների ներկայացուցիչները Թուրքիայում հանդիպել էին փետրվարի 28-ին։
Ռուս-ուկրաինական հակամարտության կարգավորման գործընթացը մեկնարկել էր ՌԴ և ԱՄՆ նախագաների միջև փետրվարի 12-ին կայացած հեռախոսազրույցից հետո։ Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել էին Ուկրաինայի հարցով Ռուսաստանի և ԱՄՆ պատվիրակությունների բանակցությունները, որոնք տևել էին ավելի քան 4 ժամ։ Ավելի ուշ ԱՄՆ պետքարտուղարությունն Ուկրաինայի հարցով ՌԴ-ի հետ ձեռք բերված 4 պայմանավորվածություն էր հրապարակել։
Մարտի 12-ին ԱՄՆ պետքարտուղար Մարկո Ռուբիոն Ռուսաստանին կոչ էր արել 30-օրյա հրադադար հաստատել Ուկրաինայում։ Մարտի 11-ին Կիևը համաձայնել էր ընդունել ժամանակավոր հրադադարի մասին ԱՄՆ-ի առաջարկը: Ռուսաստանը համաձայնել էր ռազմական գործողությունները դադարեցնելու առաջարկներին այն պայմանով, որ դրանք պետք է հանգեցնեն երկարաժամկետ խաղաղության:
