Մեզ տրված քվեները չենք փոշիացնելու, այն ծառայելու է Գյումրուն ու բոլոր գյումրեցիներին, հայտարարել է Գյումրիի ավագանու ընտրություններում «Քաղաքացիական պայմանագիր» կուսակցության քաղաքապետի թեկնածու, նախնական տվյալներով, առաջատար Սարիկ Մինասյանը։
«Շնորհակալ եմ յուրաքանչյուրիդ քվեի, յուրաքանչյուրիդ վստահության և պատվախնդրության համար: Մեզ համար մարդը բարձրագույն արժեք է, մեր սկզբունքներում տեղ չունեն սպառնալիքը, պարտադրանքը, խաբեությունը, ցինիզմն ու սուտը: Սիրելի՛ գյումրեցիներ, պարտավորված ենք ձեր վստահության համար, որն ի ցույց եք դրել ապահովելով կրկնակի քվեներ` ի համեմատություն շեմը հաղթահարած 2-րդ ուժի»,- գրել է նա։
Մարտի 30-ին Գյումրիում և Փարաքարում տեղի ունեցած ՏԻՄ ընտրությունների նախնական տվյալներով Գյումրիում ՔՊ-ն առաջատար է, սակայն 50+ ձայներ չի հավաքել։ Փարաքարում ՔՊ-ն պարտվել է։ Գյումրիում 81 ընտրական տեղամասի արդյունքներով՝ ՔՊ-ն և Մինասյանը հավաքել են 16 938 ձայն։ Երկրորդ տեղում «Հայաստանի կոմունիստական կուսակցության» թեկնածու, Գյումրիի նախկին քաղաքապետ Վարդան Ղուկասյանն է՝ 9537 ձայնով։ Երրորդ տեղում «Մեր քաղաքը» դաշինքն է և նրա թեկնածու Մարտուն Գրիգորյանը՝ 7296 ձայնով, չորրորդում՝ Մխիթարյանն ու «Իմ հզոր համայնքը»՝ 3659 ձայնով։ Առաջատարների հնգյակը 2844 ձայնով եզրափակում է «Մայր Հայաստան» դաշինքը, որի ցուցակը գլխավորում է Կարեն Սիմոնյանը։
Մարտի 31-ին «Իմ հզոր համայնքը» և «Մայր Հայաստանը» հայտարարել էին իրենց ձայնը երկրորդ տեղն զբաղեցրած Ղուկասյանին տալու որոշման մասին։
