Իրավապահները խուզարկություններ են սկսել «Մայր Հայաստան» դաշինքի Գյումրիի գրասենյակում, խուզարկել շտաբի պետ Արա Ոսկանյանի և համակիրների բնակարանները, հայտնել են դաշինքից։
Դաշինքի առաջնորդ Անդրանիկ Թևանյանը տեղեկացրել է, որ դաշինքի ներկայացուցիչ Էմմա Գրիգորյանին տարել են ոստիկանություն։ Այս պահին խուզարկությունները շարունակվում են։
Անդրադառնալով խուզարկություններին՝ ՀՀ ներքին գործերի նախարարությունից ավելի ուշ տեղեկացրել են, որ ՆԳՆ քրեական ոստիկանությունից և Ազգային անվտանգության ծառայությունից ստացված հաղորդումների հիման վրա Հակակոռուպցիոն կոմիտեում քրեական վարույթներ են նախաձեռնվել Գյումրիում
ընտրակաշառք տալու, ստանալու, ինչպես նաև ընտրության ժամանակ բարեգործության արգելքը խախտելու առերևույթ հանցագործությունների վերաբերյալ։
«Ընտրողին առաջարկվել է ընտրակաշառք՝ Գյումրիի ավագանու արտահերթ ընտրություններում առաջադրված կուսակցության օգտին քվեարկելու պայմանով։ Տվյալներ են ստացվել նաև նույն համայնքի ավագանու ընտրություններում առաջադրված կուսակցության անդամի, ինչպես նաև լիազոր ներկայացուցչի կողմից բարեգործության անվան տակ ընտրողներին վառելափայտ, տարազներ և այլ գույքի ձեռք բերման գումար խոստանալու մասին»,- ասված է կոմիտեի հայտարարության մեջ, որը նշվածը վկայող ձայնագրություններ է հրապարակել։
2024 թվականի նոյեմբերի 26-ին վարչապետ Նիկոլ Փաշինյանը հայտարարել էր Գյումրիի քաղաքապետի պաշտոնակատարի թեկնածուին որոշելու համար նախնական ընտրություն անցկացնելու մասին։ Դեկտեմբերի 13-ին Փաշինյանը Սարիկ Մինասյանին Գյումրիի ղեկավարի պաշտոնակատար էր նշանակել։ Գյումրիի քաղաքապետ Վարդգես Սամսոնյանը 2024 թվականի հոկտեմբերի 28-ին հրաժարական էր տվել։ Միաժամանակ՝ հրաժարական էին տվել նաև «Բալասանյան» դաշինքի ավագանու անդամները։
Հունվարի 20-ին հաստատվել էր Գյումրիում արտահերթ ընտրությունների նախապատրաստման և անցկացման հիմնական միջոցառումների ժամանակացույցը։
Փետրվարի 11-ին ռեժիսոր և պրոդյուսեր Ռուբեն Մխիթարյանը հայտարարել էր Գյումրու քաղաքապետի ընտրություններում առաջադրվելու իր որոշման մասին։ Փետրվարի 12-ին «Պատիվ ունեմ» խմբակցության անկուսակցական պատգամավոր Մարտուն Գրիգորյանն իր թեկնածությունն էր առաջադրել Գյումրու քաղաքապետի պաշտոնում։ «Մայր Հայաստանի» առաջադրած թեկնածուն Կարեն Սիմոնյանն է։ Գյումրիի քաղաքապետի պաշտոնում առաջադրվել է նաև նախկին քաղաքապետ Վարդան Ղուկասյանը։
