Ազգային ժողովը մայիսի 29-ի նիստում 66 կողմ, 30 ձեռնպահ և 0 դեմ ձայներով ընդունեց պարտադիր զինվորական կամ այլընտրանքային ծառայության զորակոչից, ինչպես նաև վարժական հավաքներից խուսափելու համար պատասխանատվությունը խստացնելու նախագիծը։
Նախագծով զինվորական ծառայությունից խուսափելու համար գործող 2-5 տարի ազատազրկման ժամկետն ավելանում է՝ դառնալով 3-6 տարի։ Վարժական հավաքներից խուսափելու դեպքում աշխատավարձի առավելագույնը քսանապատիկի չափով գործող տուգանքը կդառնա մինչև երեսունապատիկի չափով, իսկ ազատազրկումը գործող 2 տարվա փոխարեն՝ 1-3 տարի։
Արդարադատության նախարարի տեղակալ Գևորգ Քոչարյանը նախագիծը հիմնավորել էր ծառայությունից և վարժական հավաքներից խուսափելու վերաբերյալ քրեական վարույթների աճով, որոնք 2024-ին 2023-ի համեմատ ավելացել են 280-ով։
