Հայաստանի գլխավոր շտաբը և ԱՄՆ Զինված ուժերի Եվրոպական հրամանատարությունը Շտուտգարտ քաղաքի կենտրոնակայանում անցկացրել են շտաբային բանակցություններ, հայտնում է ՀՀ ՊՆ-ն:
Բանակցություններին մասնակցել է Հայաստանի պատվիրակությունը՝ ՀՀ ԶՈւ գլխավոր շտաբի պետի տեղակալ Արթուր Երոյանի գլխավորությամբ: Նման բանակցություններ անցկացվում են արդեն երկրորդ տարին անընդմեջ, ասվում է հաղորդագրության մեջ։ Դրանց շրջանակներում մի շարք հանդիպումներ են տեղի ունեցել ԱՄՆ Եվրոպական հրամանատարության բարձրաստիճան սպաների հետ։
Հունվարին Հայաստանն ու ԱՄՆ-ն ստորագրել էին ռազմավարական գործընկերության կանոնադրությունը։ 2024-ի հուլիսին ՀՀ ՊՆ Վազգեն Սարգսյանի անվան ռազմական ակադեմիայում անցկացվել էր «Արծիվ գործընկեր-2024» հայ-ամերիկյան համատեղ զորավարժությունը:
Հայաստանի պաշտպանության նախարարությունն Armenia Today-ին մեկնաբանել էր որոշումը, ըստ որի՝ ՀՀ ՊՆ-ում ամերիկյան բանակի ներկայացուցիչ է աշխատելու։ ՊՆ-ում ընդգծել էին, որ որոշումը ՀՀ ԶՈւ բարեփոխումների շրջանակում է։
Սեպտեմբերի 19-24-ը Հայաստանի անվտանգության խորհրդի գրասենյակի համակարգմամբ ԱՄՆ Պաշտպանության դեպարտամենտի վտանգների նվազեցման գործակալության հետ համատեղ Հայաստանում դաշտային վարժանք էր անցկացվել:
