Հուլիսի 8-ին ձերբակալել են «Հայաստանի էլեկտրական ցանցեր» ընկերության Մուսալեռի մասնաճյուղի գլխավոր ինժեներ Արա Ավագյանին և ՀԷՑ-ի երկու աշխատակցի, ովքեր Ավագյանի հետ հուլիսի 4-ի՝ «Տաշիր» ընկերությունների խմբի կալանավորված նախագահ Սամվել Կարապետյանին աջակցվելու հավաքի վերաբերյալ հեռախոսազրույց էին ունեցել, Armenia Today-ին տեղեկացրել է փաստաբան Տիգրան Հայրապետյանը։
Փաստաբանն ահազանգել է ձերբակալվածներից խոշտանգելու և բռնության միջոցով ցուցմունքներ ստանալու վտանգի մասին։ Նա հստակեցրել է, որ նրանցից կփորձեն ցուցմունքներ կորզել այն մասին, թե, իբր, իրենց հարկադրել են հավաքին մասնակցել։
«Համացանցում, իբրև թե, խոսակցություններ են տարածվել, թե մարդկանց ստիպել են գնալ հավաքի, ինչի առնչությամբ էլ 3 աշխատակից է ձերբակալվել։ Վատն այն է, որ խոսակցությունը, որն իբրև հավաքին մասնակցելու պարտադրանք են ներկայացրել, նույնիսկ ամենավառ երևակայության դեպքում չի կարող այդպես մեկնաբանվել»,- ընդգծել է փաստաբանը։
Նա շեշտել է, որ որևէ պարտադրանքի մասին խոսք լինել չի կարող։
«Նրանք 3-ով ուղղակի հավաքի մասին են խոսել, որևէ մեկը որևէ մեկին չի պարտադրել ու ասել՝ պետք է գաս։ Բացի այդ, անհայտ է, թե որտեղից են հայտնվել այդ ձայնագրությունները, որոնք չեն կարող օրինական լինել։ Դրանք ձեռք են բերվել օրենքի խախտմամբ, չեն կարող ապացույց ճանաչվել և դրանց հիման վրա քրեական վարույթ չի կարող հարուցվել»,- հավելել է նա՝ նշելով, որ ապօրինի գաղտնալսում է տեղի ունեցել։
Հայրապետյանը տեղեկացրել է, որ ձերբակալվածներին արդեն ավելի քան 5 ժամ է պահում են Զեյթունի քննչական բաժնում և փաստաբաններին չեն թույլատրում տեսակցել նրանց։
«Անձամբ զանգել եմ Մարդու իրավունքների պաշտպանի արագ արձագանքման գրասենյակ, բողոք եմ ներկայացրել այն մասին, որ նրանց, փաստորեն, ստիպում են ցուցմունք տալ։ Ստիպել ասելով՝ նկատի չունեմ համոզել։ Ստիպում են՝ խոշտանգելով, հոգեբանական ուժեղ ճնշում գործադրելով, չեմ բացառում՝ նաև ֆիզիկական բռնություն են գործադրում ցուցմունք կորզելու համար։ Մեծ հաշվով՝ սարքում են «ապացույցներ»՝ բռնություն ու ճնշում գործադրելու միջոցով»,- հավելել է փաստաբանը։
Հայրապետյանն իրավապահների գործողությունները «բացահայտ ապօրինի, անօրինական» է որակել։
«Անձը ձերբակալման պահից իրավունք ունի պաշտպան ունենալ։ 20 տարվա մեջ չեմ տեսել դեպք, երբ փաստաբանը գնա ու չկարողանա ձերբակալվածին իրավաբանական օգնություն տրամադրել։ Սա բոլոր սահմաններն անցնել է նշանակում»,- շեշտել է փաստաբանը։
Հայրապետյանը հավելել է, որ ՄԻՊ-ից խոստացել են այց կազմակերպել, բայց մինչ այս պահը որևէ բան տեղի չի ունեցել։
ՄԻՊ-ն, իր հերթին, հայտարարել է, որ տարբեր փաստաբաններից ստացել է ահազանգեր այն մասին, որ նախաքննական մարմինը ժամեր շարունակ չի ապահովվում իրենց տեսակցությունը ձերբակալված վստահորդների հետ։ ՄԻՊ-ը փաստաբանների մուտքի արգելքն իսպառ բացառելու կոչ է արել։
«Խիստ մտահոգիչ է վստահորդների իրավունքների պաշտպանությունն ստանձնելու նպատակով ներկայացած փաստաբանների մուտքի առումով խոչընդոտներ ստեղծելու պրակտիկան: Նման գործելաոճը վտանգում է վարույթն իրականացնող մարմնի վարչական շենքում գտնվող՝ հատկապես քրեական հետապնդման ենթարկվող անձանց իրավաբանական օգնություն ստանալու, փոխկապակցված այլ իրավունքների պատշաճ իրացումը»,- ասված է ՄԻՊ հայտարարության մեջ։
Հուլիսի 2-ի առավոտյան վարչապետ Նիկոլ Փաշինյանն սպառնացել էր աշխատանքից ազատել ՀԷՑ աշխատակիցներին՝ «քաղաքական ինտրիգներով» զբաղվելու և իրենց պարտականությունները չկատարելու համար։ Նույն օրը խուզարկություններ էին սկսվել Երևանում գտնվող «Տաշիր գրուպ»-ի գլխավոր գրասենյակում։
Հայաստանի խորհրդարանը հուլիսի 3-ին ընդունել էր մի շարք օրենսդրական փոփոխություններ, որոնք ուղղված են «Տաշիր» ընկերությունների խմբին պատկանող ՀԷՑ-ը պետության վերահսկողության տակ վերցնելուն։
Հուլիսի 4-ին Քննչական կոմիտեն Armenia Today-ին տեղեկացրել էր, որ ընկերության գրասենյակում կատարված խուզարկություններից հետո հարուցված գործի շրջանակում կալանավորվածների թիվը հասել է չորսի։ Հուլիսի 8-ին իրավապահները քննչական գործողություններ էին իրականացրել ՀԷՑ-ում և ընկերության տնօրենների խորհրդի նախագահ Նարեկ Կարապետյանի տանը։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
