«Տաշիր» ընկերությունների խմբի նախագահ, ՀԷՑ-ի սեփականատեր Սամվել Կարապետյանի պաշտպանության խորհուրդը ՀԷՑ-ի այն աշխատակիցներին, որոնց ՀՀ վարչապետն սպառնացել էր «քաղաքական խարդավանքներով» պայմանավորված՝ ազատել աշխատանքից, հորդորել է հանգիստ լինել, քանի որ նրանց համարժեք պայմաններով աշխատանք կառաջարկվի։
«ՀԷՑ այն աշխատակիցներին, ում կսպառնան մշուշոտ ապագայում աշխատանքից ազատել ինչ-ինչ շինծու պատճառներով իրենց հասարակական կամ կրոնական համոզմունքների համար, թող հանգիստ լինեն, նրանց աշխատանքային խախտված իրավունքները կվերականգնվեն, իսկ այդ ընթացքում նրանք կունենան համարժեք պայմաններով աշխատանք»,- ասվում է հաղորդագրությունում:
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը:
Հուլիսի 1-ին «Տաշիր» ընկերությունների խմբի առաջին փոխնախագահ Նարեկ Կարապետյանը հայտարարել էր Երևանում կայանալիք երթի մասին՝ երկրում տիրող անարդարությունների և անօրինականությունների դեմ: Նա քաղաքացիներին կոչ էր արել հուլիսի 4-ին՝ ժամը 18:00-ին, հավաքվել Երևանի Մաշտոցի պողոտայի Սիզնս (Մալիբու) այգու մոտ: Հուլիսի 2-ին ՀՀ վարչապետ Նիկոլ Փաշինյանն սպառնացել էր աշխատանքից ազատել ՀԷՑ-ի այն աշխատողներին, որոնք զբաղված են «քաղաքական խարդավանքներով»։ Փաշինյանի գրառմանը հաջորդել էին խուզարկությունները «Տաշիր գրուպի» գլխավոր գրասենյակում։
Ազգային ժողովն այսօր առաջին ընթերցմամբ 65 կողմ, 30 դեմ ձայների հարաբերակցությամբ ընդունել էր ՀԷՑ-ը պետականացնելուն միտված նախագիծը:
