Իրանը Չինաստանից պատվիրել է հազարավոր տոննա ամոնիումի պերքլորատ՝ բալիստիկ հրթիռների վառելիքի հիմնական բաղադրիչը, հաղորդում է The Wall Street Journal-ը։
Այս մատակարարումները, որոնք պետք է հասնեն առաջիկա ամիսներին, կարող են օգտագործվել հարյուրավոր հրթիռների արտադրության համար։ Պարբերականի տվյալներով՝ նյութերի մի մասը, հնարավոր է, փոխանցվի դաշնակից զինված խմբավորումներին, օրինակ՝ Եմենի հութիներին։
Պատվերն իրականացվել է իրանական մի ընկերության կողմից՝ Հոնկոնգում գրանցված ֆիրմայի միջոցով։ Ամերիկյան պաշտոնյաները գնահատում են, որ գնման ծավալը թույլ կտա արտադրել մինչև 800 հրթիռ։ Իրանը, որն ունի տարածաշրջանում բալիստիկ հրթիռների ամենամեծ ծրագրերից մեկը, միջուկային ծրագրի շուրջ բանակցությունների շրջանակում կտրականապես հրաժարվում է սահմանափակումներ ներառել իր հրթիռային կարողությունների վրա։
ԱՄՆ-ն, աճող լարվածության պայմաններում, վերջերս պատժամիջոցներ է սահմանել մի շարք ֆիզիկական և իրավաբանական անձանց նկատմամբ Իրանում և Չինաստանում, որոնք կապ ունեն հրթիռային վառելիքի բաղադրիչների մատակարարման հետ։ Պետդեպարտամենտի ներկայացուցիչը հայտարարել է, որ Չինաստանի աջակցությունն Իրանի և նրա տարածաշրջանային դաշնակիցների հրթիռային ծրագրերին լուրջ մտահոգություն է առաջացնում։
WSJ-ն նշում է, որ այս տարվա սկզբին Չինաստանն արդեն իսկ ուղարկել էր նատրիումի պերքլորատի խմբաքանակներ Իրան, որոնցից արտադրվում է ամոնիումի պերքլորատ։ Արևմտյան աղբյուրների տվյալներով՝ այս նյութերը նախատեսված էին Իսլամական հեղափոխության պահապանների կորպուսի (ԻՀՊԿ) համար և կարող էին օգտագործվել միջին հեռահարության հրթիռների արտադրության մեջ։
