Հայաստանի խորհրդարանը մերժել է «Պատիվ ունեմ» խմբակցության հեղինակած նախագիծը, որն առաջարկում էր ԱԺ կողմից հայտարարություն ընդունել Հայրենական մեծ պատերազմում հաղթանակի 80-ամյակի կապակցությամբ։
Նախաձեռնությունն օրակարգ չի ընդգրկվել 27 կողմ, 54 դեմ, 2 ձեռնպահ ձայներով։ Ավելի վաղ նախագիծը բացասական եզրակացություն էր ստացել Ազգային ժողովի արտաքին հարաբերությունների հանձնաժողովից։
«Պատիվ ունեմ» խմբակցության քարտուղար Տիգրան Աբրահամյանը նշել է, որ համապատասխան հանձնաժողովը բացասական եզրակացություն է տվել այս նախագծի վերաբերյալ՝ այն դիտարկելով «շահերի աշխարհաքաղաքական բախման և պատմական փաստերի խեղաթյուրման համատեքստում»։ Միևնույն ժամանակ՝ տեքստի վերաբերյալ պաշտոնական առաջարկներ չեն ստացվել։
Դեմ քվեարկած պատգամավորները նշել են, որ վերջին տասնամյակում Հաղթանակի օրվա կապակցությամբ խորհրդարանում հայտարարությունների տեքստեր չեն ընդունվել և որ նման հայտարարություններ, սովորաբար, արվում են ողբերգությունների կամ հիշարժան ամսաթվերի դեպքում, և Ազգային ժողովում նման ավանդույթ չկա։
«Քաղաքացիական պայմանագիր» խմբակցությունը Հաղթանակի 80-ամյակի կապակցությամբ հայտարարությունը խորհրդարանում քննարկելուց հրաժարվելը բացատրել է նրանով, որ նախագծում անտեսվում է ԱՄՆ-ի, Միացյալ Թագավորության և այլ երկրների ներդրումը ֆաշիզմի դեմ պայքարում։
«Քննարկվող հայտարարության տեքստը գործնականում չի արտացոլում համընդհանուր մարդկային համագործակցությունը։ Շեշտը դրվում է բացառապես Խորհրդային Միության վրա՝ առանց հիշատակելու այն երկրները, որոնք ոչ պակաս վճռորոշ դեր են խաղացել Հաղթանակի ժամանակ, ինչպիսիք են Միացյալ Նահանգները և Մեծ Բրիտանիան»,- ասել է պատգամավոր Հասմիկ Հակոբյանը՝ կոչ անելով քվեարկել նախագծի դեմ։
«Քաղաքացիական պայմանագիրը» նաև արհեստական է համարել տեքստում 47 տարվա տարբերությամբ տեղի ունեցած իրադարձությունների՝ 1992 թվականի մայիսի 8-ին ադրբեջանական օկուպացիայից Շուշի քաղաքի ազատագրման և 1945 թվականի մայիսի 9-ին Երկրորդ համաշխարհային պատերազմում տարած հաղթանակի կապը։
«Նման զուգահեռները ոչ մի ընդհանուր բան չունեն ո՛չ իրենց էությամբ, ո՛չ պատմական ժամանակով, ո՛չ էլ միջազգային ընկալմամբ»,- ասել է Հակոբյանը։
Մայիսի 9-ին լրացել էր Հայրենական մեծ պատերազմում տարած հաղթանակի 80-ամյակը։ Հայ ժողովուրդը Երկրորդ համաշխարհային պատերազմի ժամանակ ակտիվ մասնակցություն է ունեցել նացիստական Գերմանիայի պարտությանը և նշանակալի ներդրում ունեցել Հաղթանակի գործում։ Պատերազմին մասնակցել են ավելի քան 500 հազար հայեր, որոնցից մոտ 300 հազարը զոհաբերել են իրենց կյանքն այս հաղթանակի համար։
Հայաստանում մայիսի 9-ն ավանդաբար ունի հատուկ նշանակություն և կոչվում է «Եռատոն»։ Այս օրը հայ ժողովուրդը նշում է 1945 թվականի Հայրենական մեծ պատերազմում տարած հաղթանակը, Շուշիի ազատագրումն ադրբեջանական օկուպացիայից և 1992 թվականին Արցախի պաշտպանության բանակի ստեղծումը։
