ՀՀ երկրորդ նախագահ Ռոբերտ Քոչարյանը մեկնաբանել է վարչապետ Նիկոլ Փաշինյանին Ազգային ժողովում անվստահություն հայտնելու (իմփիչմենթ-խմբ․) նախաձեռնությունը և հայտարարել, որ գործընթացը հաջողություն չի ունենա։ Նա չի համաձայնել պնդումների հետ, թե վարչապետի իմփիչմենթին դեմ է մեկ Փաշինյանը, մեկ՝ ինքը, որովհետև վստահ չէ, որ Փաշինյանը դեմ է իր նկատմամբ իմփիչմենթին, քանի որ դա ձեռնտու է նրան։
«Պարզապես կան քարոզիչներ, ովքեր մտել են խնդրի մեջ՝ իմ տպավորությամբ, չպատկերացնելով, թե ինչ են անում։ Ես որևէ մեկից չեմ լսել կարծիք, թե իմփիչմենթն իրատեսական սցենար է, նույնիսկ նախաձեռնողներն են ասում՝ փորձենք, լինի՝ լինի, չէ՝ չէ։ Ես ավելի պրագմատիկ մարդ եմ․ ինձ հետաքրքիր չէ մտնել մի գործընթացի մեջ, որի հաջողության հավանականությունը զրո է»,- նշել է Քոչարյանը։
Ըստ երկրորդ նախագահի՝ իմփիչմենթը հետաքրքիր է նրանց, ովքեր, օրինակ, 48 ժամով վարչապետի թեկնածու լինելու կյանքի երազանք ունեն։
«Օրինակ՝ մեկը, որին ոչ ոք չի ճանաչում, սկսում է հարցազրույցներ տալ, քննարկումների կենտրոնում լինել։ Եթե մարդու համար այդ 48 ժամը ուշադրության կենտրոնում լինելը կյանքի երազանք է, չի նշանակում, որ մենք այդ երազանքի իրականացման համար ֆոն կամ դեկորացիա պետք է դառնանք»,- շեշտել է Քոչարյանը։
Անդրադառնալով խաղաղության պայմանագրի շուրջ Հայաստանի և Ադրեջանի բանակցություններին՝ նախկին նախագահը դրանք «լուրջ» չի անվանել՝ հաշվի առնելով նաև աշխարհաքաղաքական իրավիճակը։
«Այդ փաստաթուղթը ոչ թե խաղաղության, այլ Փաշինյանի քաղաքական հեռանկարը շարունակելու մասին է լինելու։ Այն լինելու է անբովանդակ և ավելի շատ ներքաղաքական նպատակներ է հետապնդելու։ Որևէ լավ բան չենք կարող սպասել՝ նաև աշխարհաքաղաքական բաղադրիչը հաշվի առնելով։ Կա ձախողված առաջնորդ, որի նպատակն ամեն գնով աթոռը պահելն է, և կան այս ամենի շուրջ խաղացողներ, ովքեր կգնահատեն՝ արժե՞ իրեն այդ հարցում աջակցել, թե՞ ոչ։ Ես չեմ հավատում, որ պարտության սիմվոլը կարող է արժանապատիվ խաղաղություն բերել»,- հավելել է նա։
Քոչարյանը նշել է, որ բարեկամ ու հարևան պետությունների հետ գրավիչ գործընկեր լինելու համար առաջին հերթին պետք է ուժեղ պետություն լինել, բայց Հայաստանի իշխանությունները, ըստ նրա, երկրին «բեռ-գործընկեր» կարգավիճակի մեջ են դրել։
«Փոքր երկիրը չի կարող «շպագատ» իջնել։ Հայաստանն ի վիճակի չէ այս տարածաշրջանում միայնակ ապահովել իր անվտանգությունը, դրա համար առաջին հերթին պետք է զբաղվել սեփական բանակով։ Հաջորդիվ աշխարհաքաղաքական հնարավոր գործընկերների հետ պետք է սահմանել այն հարաբերությունները, որոնք կփոխլրացնեն բացերը։ Միամտություն է մտածել, թե եվրոպացին կարող է Հայաստանում որևէ անվտանգային հարց լուծել։ Տարածաշրջանում կա 3 պետություն, որոնք կարող են դերակատար լինել՝ ՌԴ, Իրան, Թուրքիա։ Երեք երկրներից մեր տնտեսական կապերն ավել ուժեղ են ՌԴ-ի հետ, որը մեզ մոտ է նաև մշակութային տեսանկյունից։ Ոչ թե «շպագատ», այլ ՌԴ-ի հետ դաշնացային, ռազմավարական հարաբերություններ են անհրաժեշտ, մենք այլընտրանքներ չունենք»,- հավելել է նա։
«Հայաստան» դաշինքի առաջնորդի խոսքով՝ ՌԴ-ն է տարածաշրջանային այն երկիրը, որը կարող է զսպել Թուրքիայի աճող ամբիցիաները, որոնք որոշակի սպառնալիք են Հայաստանի համար։
Քոչարյանն անդրադարձել է նաև իրեն ուղղված այն մեղադրանքներին, թե ցանկանում է Հայաստանը Միութենական պետության կազմում տեսնել։ Երկրորդ նախագահը նշել է, որ իր կառավարման տարիներին ՀՀ-ին Միութենական պետության կազմում ընդգրկելու շուրջ որևէ խոսակցություն տեղի չի ունեցել։
«Ո՛չ Ելցինի, ո՛չ Պուտինի հետ նման խոսակցություն չեմ ունեցել, ոչ էլ Լուկաշենկոն է խոսել այդ մասին»,- ընդգծել է նա՝ շեշտելով, որ այնպես չէ, թե այնտեղ այս փուլում գրկաբաց սպասում են Հայաստանին։ Քոչարյանը նշել է, որ դրա համար նախ պետք է վերականագնել ՌԴ-ի հետ հարաբերությունները, փոխադարձ վստահությունը։
Հայաստանում ընդդիմությունը վարչապետ Նիկոլ Փաշինյանին իմպիչմենթի ենթարկելու երկու նախաձեռնություն է առաջ քաշել։ Ապրիլին ընդդիմադիր գործիչներ Նարեկ Մալյանն ու Էդգար Ղազարյանը իմփիչմենթ անցկացնելու կոչով դիմել էին խորհրդարանի պատգամավորներին: Ընդդիմադիր «Պատիվ ունեմ» դաշինքը պատրաստակամություն էր հայտնել աջակցել այս նախաձեռնությանը, մինչդեռ «Հայաստան» դաշինքը կասկածի տակ էր դրել նախաձեռնության հեղինակների անկեղծությունն ու Փաշինյանին հեռացնելու համար նախ փողոցային ճնշումների կոչ էր արել: Այնուհետև «Քաղաքացիական պայմանագիր» խմբակցությունից ավելի վաղ դուրս եկած պատգամավորներ Հակոբ Ասլանյանն ու Հովիկ Աղազարյանը վարչապետի պաշտոնում առաջարկել էին ՀՀ հատուկ հանձնարարարություններով դեսպան նախկին դեսպան Էդմոն Մարուքյանի թեկնածությունը, և բանակցություններ սկսել խորհրդարանական խմբակցությունների հետ:
