Շատ մտահոգիչ եմ համարում այն հանգամանքը, որ 44-օրյա պատերազմից հետո Ադրբեջանը մեծածավալ սպառազինություն է գնում, խորհրդարանական ճեպազրույցների ժամանակ ասել է «Պատիվ ունեմ» խմբակցության քարտուղար Տիգրան Աբրահամյանը։ Նա այսպես է պատասխանել հարցադրմանը, թե Ադրբեջանը մեծաքանակ զենք է գնել ՌԴ-ից այն դեպքում, երբ վերջինս ՀՀ-ից գումար էր վերցրել ու զենք չէր մատակարարել։
Ըստ նրա՝ զենքերը ձեռք են բերվում Թուրքիայից, Իսրայելից, Պակիստանից ու եվրոպական երկրներից։
«Ռուսական մասով որևէ գործարքի կամ դրա ծավալի մասին տեղեկատվություն չունեմ։ Ի տարբերություն նախորդ տասնամյակների, երբ գնումների մի էական հատված հանրայնացվում էր տարբեր միջազգային կառույցների կամ հենց նույն Ադրբեջանի կողմից, այս վերջին տարիներին Ադրբեջանը բավականին փակ է պահում այդ տեղեկատվությունը, և միայն կանխատեսելիության որոշակի դաշտում է մնում հասկանալ, թե կոնկրետ ո՞ր երկրներից և ի՞նչ սպառազինություն է գնում»,- նշել է նա։
Պատգամավորի կարծիքով՝ ռազմաքաղաքական իրադրությունը գնահատելու և համապատասխան սպառնալիքներին ճիշտ արձագանքելու համար դա շատ կարևոր է։
Համաձայն Զենքի համաշխարհային առևտրի վերլուծության կենտրոնի տարեկան զեկույցի՝ Ադրբեջանը 2024 թվականին գնել է 2,2 մլրդ դոլարի զենք և դարձել աշխարհում 16-րդ խոշորագույն զենք ներմուծողը:
Ռուսաստանի փոխարտգործնախարար Միխայիլ Գալուզինը 2024 թվականի հունիսի 17-ին հայտարարել էր, որ Հայաստանի անցումն ԱՄՆ-ի և ՆԱՏՕ-ի «հովանոցի» տակ անհնարին կդարձնի Մոսկվայի հետ և ՀԱՊԿ-ի շրջանակներում միասնական պաշտպանական գոտու պահպանումը։ Նույն օրը Тайная политика Telegram ալիքը, հղում անելով տեղեկացված աղբյուրներին, գրել էր, որ Ռուսաստանը կարող է հրաժարվել Հայաստանի հետ զենքի և ռազմական տեխնիկայի մատակարարման վերաբերյալ բանակցություններից։
