ԱՄՆ պետքարտուղար Մարկո Ռուբիոն և ՀՀ վարչապետ Նիկոլ Փաշինյանը հեռախոսազրույցի ընթացքում համակարծիք էին, որ Հարավային Կովկասում ցանկացած էսկալացիա անթույլատրելի է, ասված է Պետդեպի հայտարարության մեջ։
«Պետքարտուղարը ողջունել է Ադրբեջանի հետ խաղաղության պայմանագրի ստորագրումը և ընդգծել կայուն խաղաղության հաստատման կարևորությունը՝ տարածաշրջանային հակամարտությունների արատավոր շրջանը կոտրելու և Հարավային Կովկասում անվտանգությունն ու բարգավաճումն ապահովելու համար»,- հավելել են Պետդեպից։
Պետքարտուղարը և ՀՀ վարչապետը քննարկել են ընդհանուր շահերը՝ որպես ռազմավարական գործընկերներ, տեղեկացրել են ԱՄՆ պետքարտուղարությունից։
Ամերկագետ Սուրեն Սարգսյանը, մեկնաբանելով հեռախոսազրույցը, գրել է, որ չէր շտապի մեկ հեռախոսազանգով պայմանավորված պնդել, որ ամերիկյան կողմը Հարավային Կովկասում սկսելու է ակտիվություն ցուցաբերել կամ հայ-ադրբեջանական պայմանագիրն ստորագրելու միջնորդ լինել:
«Առավել կարևոր է հետևել այլ հեռախոսազանգերին և զարգացումներին որոնք տեղի են ունենում Պուտինի և Թրամփի միջև, որոնք նոր իրողություններ են ձևավորում աշխարհում: Մեր մասով ավելի շատ բան կախված է լինելու Իրանի և ԱՄՆ հարաբերությունների դինամիկայից, դրանց դրական կամ բացասական զարգացումներից»,- գրել է Սարգսյանը։
ՀՀ կառավարությունից մարտի 25-ին հայտնել էին Փաշինյանի և Ռուբիոյի հեռախոսազրույցի մասին՝ ընդգծելով, որ վարչապետը պետքարտուղարին է ներկայացրել այն բանակցային գործընթացները, որոնց արդյունքում հնարավոր էր դարձել «Հայաստանի և Ադրբեջանի միջև խաղաղության և միջպետական հարաբերությունների հաստատման մասին» համաձայնագրի նախագծի համաձայնեցումը։
Մարտի 13-ին Ադրբեջանի ԱԳՆ-ն հայտարարել էր Երևանի և Բաքվի միջև խաղաղության պայմանագրի տեքստի շուրջ բանակցությունների ավարտի մասին՝ հայկական կողմի վերջին երկու կետերի վերաբերյալ Բաքվի առաջարկներն ընդունելուց հետո։ Հայաստանի ԱԳՆ-ն հաստատել էր լուրը և հայտարարել, որ Երևանը պատրաստ է Բաքվի հետ քննարկել համաձայնագրի ստորագրման ժամկետները և վայրը։ Փաշինյանը մանրամասնել էր Երևանի և Բաքվի միջև խաղաղության պայմանագրի երկու կետերի բովանդակությունը և հաստատել, որ հարցերը վերաբերում էին հայ-ադրբեջանական սահմանին երրորդ երկրների ներկայացուցիչների բացակայության դրույթին, ինչպես նաև միջազգային դատարաններում հայցերը հետ կանչելու խնդրին։
Մարտի 13-ին Ադրբեջանի նախագահ Իլհամ Ալիևը հայտարարել էր, որ Բաքվի վստահության մակարդակը Հայաստանի նկատմամբ «մոտ է զրոյին»։ Մարտի 16-ից Ադրբեջանն սկսել էր պարբերաբար հաղորդել հայկական կողմից իբր արձակված կրակոցների մասին։ ՀՀ պաշտպանության նախարարությունը հերքել էր այդ լուրերը։ Մարտի 25-ին ՀՀ ՊՆ-ն հայտարարել էր, որ «Հայաստան-Ադրբեջան սահմանագծի երկայնքով երբեմն արձանագրվում են կրակոցներ, որոնք չեն թիրախավորում ՀՀ տարածքը»։
