Ընդդիմադիր «Հայաստան» խմբակցության պատգամավոր Արթուր Խաչատրյանը մեկնաբանել է Հայաստանի վարչապետ Նիկոլ Փաշինյանի և ՌԴ նախագահ Վլադիմիր Պուտինի հեռախոսազրույցը Բաքվի հետ խաղաղության պայմանագրի տեքստի համաձայնեցումից հետո։
Խաչատրյանը հիշեցրել է, որ Փաշինյանը զանգահարել է Պուտինին նաև Եվրամիությանը Հայաստանի անդամակցության սկզբի մասին օրինագծի ընդունումից անմիջապես հետո։ Սա, ըստ Խաչատրյանի, կապված է աշխարհաքաղաքական իրավիճակի փոփոխության հետ։
«Փաշինյանը հասկանում է, որ Արևմուտքն այժմ բոլորովին այլ առաջնահերթություններ ունի, Եվրոպան ինքն է փորձում լուծել իր անվտանգության խնդիրները՝ հաշվի առնելով ԱՄՆ-ի հռչակած նոր քաղաքականությունը։ Բացի այդ, ԱՄՆ-ի և Ռուսաստանի միջև մերձեցում է նախատեսվում, և որքան էլ Հայաստանը ջանա, այնուամենայնիվ, Արևմուտքն ունի իր առաջնահերթությունները»,- լրագրողներին պարզաբանել է պատգամավորը։
Մարտի 13-ին Ադրբեջանի ԱԳՆ-ն հայտարարել էր Երևանի և Բաքվի միջև խաղաղության պայմանագրի տեքստի շուրջ բանակցությունների ավարտի մասին, հայկական կողմի վերջին երկու կետերի վերաբերյալ Բաքվի առաջարկները ընդունելուց հետո։ Հայաստանի ԱԳՆ-ն հաստատել էր լուրը և հայտարարել, որ Երևանը պատրաստ է Բաքվի հետ քննարկել համաձայնագրի ստորագրման ժամկետները և վայրը։ Վարչապետ Նիկոլ Փաշինյանը մանրամասնել էր Երևանի և Բաքվի միջև խաղաղության պայմանագրի երկու կետերի բովանդակությունը և հաստատել, որ հարցերը վերաբերում էին հայ-ադրբեջանական սահմանին երրորդ երկրների ներկայացուցիչների բացակայության դրույթին, ինչպես նաև միջազգային դատարաններում հայցերը հետ կանչելու խնդրին։ Մարտի 13-ին Ադրբեջանի նախագահ Իլհամ Ալիևը հայտարարել էր, որ Բաքվի վստահության մակարդակը Հայաստանի նկատմամբ «մոտ է զրոյին»։
ՀՀ վարչապետ Նիկոլ Փաշինյանը խաղաղության պայմանագրի բանակցությունների մասին պատմել էր ՌԴ նախագահ Վլադիմիր Պուտինին, Իրանի նախագահ Մասուդ Փեզեշքիանին, Ֆրանսիայի նախագահ Էմանուել Մակրոնին։
