Հայաստանում գրիպի ու սուր շնչառական վարակների սեզոնային ակտիվացմանը զուգահեռ՝ հանրապետության դպրոցներում շատացել են աշակերտների բացակայությունները, որը շուրջ 100 երեխայի դեպքում կավարտվի վերաքննությամբ։
Այն բանից հետո, երբ ծնողները կապվեցին խմբագրության հետ և ասացին, որ իրենց երեխաներին դեռևս չապաքինված ստիպված էին ուղարկել դպրոց, Armenia Today-ը կապ հաստատեց ՀՀ առողջապահության և ԿԳՄՍ նախարարության հետ՝ հասկանալու համար, թե արդյոք նրանք վերլուծո՞ւմ են վիրուսների տարածման խնդիրը և կփոխե՞ն այն կանոնները, որոնց համաձայն հաջորդ դասարան տեղափոխվելու թույլտվություն ստանալու համար պետք է քննություն հանձնեն (60 թույլատրելի բացակա՝ ոչ նոր հանրակրթության պետական չափորոշիչների և 200 բացակա՝ նոր չափորոշիչների դեպքում):
«Երկրորդ կիսամյակի ընթացքում ունենք 92 աշակերտ, որոնք բացակայել են 60 ժամից ավելի և 7 աշակերտ, որոնց 200 ժամն է գերազանցում»,- Armenia Today-ին ասաց ԿԳՄՍՆ հանրակրթության վարչության պետ Թամարա Սարգսյանը։
Նա հիշեցրեց, որ հանրակրթության պետական չափորոշիչները դեռևս չեն ներդրվել 1-ին, 4-րդ, 9-րդ, 11-րդ և 12-րդ դասարաններում, որոնց դեպքում թույլատրելի բացակաների քանակը 60 է։
«Այս դեպքում աշակերտը պետք է լրացուցիչ գրավոր աշխատանք գրի այն առարկաներից, որոնցից բացթողումներն ունեցել է։ Մյուս դասարանների դեպքում թույլատրված բացակաների քանակը 200 է»,- ասաց նա։
Ըստ ԿԳՄՍՆ հանրակրթության վարչության պետի՝ վերաքննության ենթակա աշակերտների քանակը մեծ չէ, քանի որ նախարարությունը տարբեր մեխանիզմներ է կիրառում երեխաների բացակաները մեղմելու կամ բացառելու համար։
«Չափորոշչով դասարաններում երկարօրյայով ուսուցումն է գործում, եթե աշակերտը որևէ թեմայից ցածր առաջադիմություն է ցուցաբերում, երկարօրյա ուսուցման միջոցով բացթողումը լրացնում է, որով կարողանալու է մնացած (հաջորդող) թեմաներն ուսումնասիրել։ Մյուս դեպքերում երեխայի ծնողը դիմում է դպրոցին, և դպրոցը երեխայի ուսուցումը կազմակերպում է հեռավար եղանակով, կարող են լինել հանձնարարությունների, ուսուցիչների հետ առանձին աշխատելու և թեմաներ բացատրելու եղանակներով։ Այս դեպքում բացականեր չեն նշանակվում»,- պարզաբանեց Սարգսյանը։
Ըստ նրա՝ անմիջապես դասարանի հետ առցանց կապի միջոցով դասին մասնակցելու հնարավորություն չկա ու չի նախատեսվում ներդնել, քանի որ դա ենթադրում է գույքային հագեցվածություն հանրապետության բոլոր դասարաններում, ինչն այս պահի դրությամբ իրատեսական չէ, քանի դեռ նախարարությունն աշխատում է դպրոցների լաբորատոր վերազինման ուղղությամբ։
Առողջապահության նախարարության մամուլի խոսնակ Մարիամ Ծատրյանն Armenia Today-ին հայտնեց, որ նախարար Անահիտ Ավանեսյանին ամեն օր զեկուցվում է երկրում տիրող համաճարակային իրավիճակը՝ պայմանավորված ՍՇՎ-ով ու գրիպով։
«Սկսվում է սեպտեմբերից և շարունակվում մինչև ապրիլ ներառյալ, քանի որ հաճարակային իրավիճակի ակտիվացում նկատվում է այդ ժամանակահատվածում։ Մինչև նախորդ շաբաթ ունեցել ենք սեզոնին բնորոշ ակտիվություն, սակայն վերջին 5-6 օրում հիվանդացության 1,1%-ով նվազում ունենք, բայց H1N1-ն իր հարուցիչներով շարունակվում է շրջանառվել»,- նշեց նա։
Ծատրյանի խոսքով՝ այս պահին դպրոցներում հեռավար ուսման անցնելու որևէ նախադրյալ չկա։
«Այս պահի դրությամբ չկա նման նախադրյալ, որ առաջարկ անենք ԿԳՄՍՆ-ին՝ գնալ հեռավար ուսուցման, քանի որ կարգավորման մեջ նշվում է, որ դասարանի բացակաների 25%-ը պետք է պայմանավորված լինի ՍՇՎ-ով կամ գրիով։ Բայց մեր ամենօրյա ֆիլտրով՝ պատկերը դա ցույց չի տալիս»,- շեշտեց խոսնակը։
Երևանի 155 դպրոցի ծնող Հռիփսիմե Ղազարյանը, սակայն, նշում է, որ վիրուսային հիվանդությունները պատուհաս են դարձել իրենց համար։
«Մեկ հիվանդ երեխան, հաճախելով դպրոց, վարակում է ամբողջ՝ 30 հոգանոց դասարանին։ Երկար բացակայել չենք կարող, քանի որ բժշկի թուղթը, այսպես կոչված, համարվում է «ոչ հարգելի», և բացակայությունների դեպքում երեխան պետք է վերաքննության ներկայանա»,- պատմեց նա։
Ծնողի խոսքով՝ սրանից խուսափելու համար ծնողը հիվանդ երեխային բերում է դպրոց, այստեղից էլ համաճարակը տարածվում է։ Երեխան հիվանդ գալիս է տուն, վարակում տան անդամներին։
«Դեկտեմբերից սկսած մինչ օրս չենք կարողանում առողջանալ՝ շարունակ կրկնվող վիրուսների հետևանքով։ ԿԳՄՍՆ-ի օրենքը համարում եմ չհաջողված, ինչպե՞ս կարելի է հաշվի չառնել երեխայի հիվանդությունը»,- շեշտեց նա։
Իր հերթին՝ Հանրակրթության վարչության պետն ասաց, որ վերաքննությունը երեխաների բացակաների պատիժը չէ, այլ նրանց համար հնարավորություն է բացթողումը լրացնելու և նորմալ դասապրոցեսին միանալու համար։
Արաքսյա Սնխչյան
